بڑی سیاسی جماعتیں 5 فروری کو آزاد کشمیر میں عوامی طاقت کا مظاہرہ کریں گی

اسلام آباد :  جیسا کے آزاد جموں کشمیر (اے جے کے) میں انتخابی سال کا آغاز ہوا، اپوزیشن کی پاکستان ڈیموکریٹک موومنٹ (پی ڈی ایم) اور حکمراں جماعت پاکستان تحریک انصاف نے یوم یکجہتی کشمیر کے موقع پر 5 فروری کو وادی میں 2 مختلف مقامات پر عوامی طاقت کا مظاہرہ کرنے کا فیصلہ کیا ہے۔

چونکہ 10 جماعتی پی ڈی ایم نے آزاد کشمیر کے دارالحکومت مظفرآباد میں جلسے کرنے کے  منصوبے کو پہلے ہی حتمی شکل دے دی تھی اس لیے پی ٹی آئی کی جانب سے بتایا گیا کہ وزیراعظم عمران خان اسی روز کوٹلی میں ایک عوامی جلسے سے خطاب کریں گے۔

پی ٹی آئی کے ترجمان نے بتایا کہ پارٹی کے سیکریٹری جنرل عامر محمود کیانی کو جلسے کے  انتظامات کو حتمی شکل دینے کے لیے اتوار کے روز کوٹلی جانے کی ہدایت کی گئی ہے جس کے لیے پارٹی کے آزاد کشمیر چیپٹر کے صدر بیرسٹر سلطان محمود چودھری کو بھی ذمہ داریاں سونپ دی گئیں ہے۔

بیرسٹر سلطان گزشتہ کئی روز سے مسلم لیگ اور پاکستان پیپلزپارٹی کے آزاد کشمیر چیپٹر میں عدم استحکام پیدا کرنے کی کوششوں میں مصروف ہیں۔

ان دونوں اپوزیشن جماعتوں کے کچھ اراکین رواں برس ہونے والے انتخابات سے قبل ہی پی ٹی آئی میں شمولیت کا اعلان کرچکے ہیں۔

آزاد کشمیر کے ایک وزیر نے کہا کہ وزیراعظم عمران خان 5 فروری کی صبح پہلے اے جے کے کی قانون ساز اسمبلی کے روایتی اجلاس سے خطاب کریں گے اور اس کے بعد جلسے میں شرکت کے لیے کوٹلی جائیں گے۔