افغانستان: تعلیمی مرکز کے قریب خودکش دھماکا، 18 افراد ہلاک

افغانستان کے دارالحکومت کابل میں تعلیمی مرکز کے قریب خودکش دھماکے میں 18 افراد ہلاک اور 57 زخمی ہوگئے۔

غیر ملکی خبر رساں ایجنسی ’اے ایف پی‘ کے مطابق کابل کے مغربی ضلع میں اعلیٰ تعلیم حاصل کرنے والے طلبا کو تربیت دینے اور کورسز کرانے والے تعلیمی سینٹر کے قریب حملہ سہ پہر کے وقت ہوا۔

افغان وزارت داخلہ کے ترجمان طارق آرائین نے بیان میں کہا کہ ’خودکش بمبار تعلیمی سینٹر میں داخل ہونا چاہتا تھا‘۔

انہوں نے کہا کہ سینٹر کے گارڈز کی جانب سے شناخت کیے جانے کے بعد خودکش بمبار نے باہر ہی خود کو دھماکے سے اڑا لیا۔