3 روزہ شندور پولو فیسٹیول کا رنگا رنگ تقریبات کے ساتھ آغاز

چترال: (ویب ڈیسک) صوبہ خیبر پختونخوا میں 3 روزہ شندور پولو فیسٹیول کا رنگا رنگ تقریبات کے ساتھ آغاز ہوگیا، 12 ہزار 5 سو فٹ دنیا کے بلند ترین پولو میدان میں کھیلا جانے والا یہ فیسٹیول اپنی نوعیت کا اہم فیسٹیول ہے۔
اس موقع پر مقامی فنکاروں نے بھی اپنے فن کا مظاہرہ کرتے ہوئے کیلاشی، چترالی، خٹک ڈانس اور مقامی نغمے پیش کئے گئے، حکومت خیبر پختونخوا اور فرنٹیئر کور نارتھ کے باہمی اشتراک سے منعقدہ افتتاحی تقریب میں پیرا گلائیڈرز اور پیرا ٹروپرز نے وہاں موجود شائقین سے خصوصی داد وصول کی۔
شندور پولو فیسٹول کے پہلے دن مختلف ٹیموں کے درمیان تین میچز کھیلے گئے، فیسٹول کو دیکھنے کے لئے بڑی تعداد میں ملک بھر سے سیاحوں نے علاقے کا رخ کیا ہے، اس کے ساتھ ساتھ اعلیٰ سول اور ملٹری عہدیداران سمیت مقامی انتظامیہ کے عہدیداران اور بڑی تعداد میں علاقے کے عوام نے شرکت کی۔
3 روزہ فیسٹیول میں پولو کے میچز کے ساتھ ساتھ شرکاء کے لئے رات کے وقت خصوصی طور پر آتش بازی اور کیمپ فائر کا بھی اہتمام کیا گیا ہے جبکہ اس موقع پر علاقائی فنکار بھی اپنے فن کا مظاہرہ کریں گے۔