پی ٹی آئی کو کنونشن سینٹر اسلام آباد میں ورکرز کنونشن کی اجازت مل گئی

حکومت نے تحريک انصاف کو اسلام آباد کے کنونشن سینٹر میں ورکرز کنونشن کی اجازت دے دی۔

چيف جسٹس اسلام آباد ہائی کورٹ جسٹس اطہر من اللہ نے پی ٹی آئی کو کنونشن سینٹر اسلام آباد میں ورکرز کنونشن کی اجازت نہ دیئے جانے کے خلاف دائر درخواست پر سماعت کی۔

ایڈیشنل اٹارنی جنرل منور اقبال دُگل نے عدالت کو بتايا کہ اسلام آباد انتظامیہ نے پی ٹی آئی کو این او سی جاری کردیا ہے۔

تحریک انصاف کے وکیل نے بھی عدالت کے روبرو تصدیق کی کہ ہمیں این او سی مل گیا ہے، قواعد و ضوابط بھی طے ہوگئےہيں۔ ایک درخواست ہے کہ عدالت آئندہ کے لیے ڈائریکشن دے دے۔

چيف جسٹس اطہرمن اللہ نے ريمارکس ديئے کہ مستقبل کے لیے ہم کوئی ڈائریکشن نہیں دے سکتے،يہ انتظامی معاملہ ہے،مستقبل میں کیا ہوسکتا ہے کیوں کہ حالات کا پتہ نہیں ہوتا،عدالت انتظامیہ کے معاملات میں مداخلت نہیں کرے گی، آپ کو این او سی مل گیا ہے بس آپ کی درخواست نمٹا رہے ہیں۔