این اے 246 کراچی جنوبی کے ضمنی الیکشن میں سابق وزیراعظم عمران خان کے کاغذات نامزدگی کی منظوری کیخلاف الیکشن ٹریبونل نے ايم کيو ايم پاکستان اور پيپلزپارٹی کی اپيليں مسترد کردیں۔
پاکستان تحریک انصاف کے اراکین قومی اسمبلی کے استعفوں کی منظوری کے بعد کراچی سمیت ملک بھر کے 9 حلقوں میں انتخابات کا اعلان کیا تھا۔
چیئرمین پی ٹی آئی عمران خان نے تمام حلقوں سے خود الیکشن لڑنے کا اعلان کیا اور تمام 9 حلقوں سے کاغذات نامزدگی جمع کرائے، 8 حلقوں سے کاغذات منظور اور فیصل آباد کی نشست پر مسترد کردیئے گئے تھے۔
ایم کیو ایم پاکستان اور پیپلزپارٹی نے این اے 246 پر عمران خان کے کاغذات نامزدگی کی منظوری کیخلاف الیکشن ٹریبونل میں اعتراض کرتے ہوئے اپیلیں دائر کی تھیں، جو مسترد کردی گئی ہیں۔
الیکشن ٹریبونل کا اپنے فیصلے میں کہنا ہے کہ پی ٹی آئی چیئرمین کیخلاف درخواستوں میں حقائق چھپانے کا الزام عائد کیا گیا تھا، الیکشن ٹریبونل نااہلی کا فیصلہ کرنے کی مجاز نہیں، پارلیمنٹیرین کی تاحیات نااہلی کا فیصلہ الیکشن کمیشن یا ٹریبونل کا اختیار نہیں۔
