وزیراعظم کا دوست ملک سے ملنے والے تحائف نہ رکھنے کا اعلان

وزیراعظم شہبازشریف نے نئی روایت قائم کرتے ہوئے دوست ممالک سے ملنے والے تحائف خود نہ رکھنے اور عوام کو دکھانے کا اعلان کردیا۔

وزیراعظم شہبازشریف نے وزیراعظم ہاؤس میں نئی روایت قائم کردی ہے، اور دوست ممالک سے ملنے والےتحائف خود نہ رکھنے کا اعلان کرتے ہوئے ہدایت کی ہے کہ غیرملکی تحائف وزیراعظم ہاؤس میں ہی مستقل طور پر رکھے جائیں۔

وزیراعظم شہبازشریف نے ہدایت جاری کی ہے کہ قیمتی تحائف وزیراعظم ہاؤس میں ہی رکھنےکی پالیسی بنائی جائے، اور ان تحائف کو عوام کو دکھانےکا اہتمام بھی کیا جائے، تاکہ عوام بھی دوست ممالک کی پاکستان سے محبت سے آگاہ ہوسکیں۔

وزیراعظم شہبازشریف کی ہدایت پروزیراعظم ہاؤس میں تحائف کیلئےجگہ مختص کردی گئی ہے۔

وزیراعظم نے بیرون ممالک سےملنےوالےتحائف سرکاری خزانےمیں جمع کرادیئے ہیں اور کابینہ ڈویژن کو آئندہ بھی کوئی تحفہ خود نہ رکھنے سے آگاہ کردیا ہے۔

وزیراعظم کی جانب سے توشہ خانے میں جمع کرائے گئے تحائف کی مالیت 27 کروڑ روپے ہے، وزیراعظم کو یہ قیمتی تحائف خلیجی ممالک کے دوروں کےدوران ملے تھے ۔

وزیراعظم شہبازشریف کو ملنے والے تحائف میں ہیرے جڑی 2 قیمتی گھڑیاں بھی شامل ہیں اور ایک گھڑی کی مالیت 10 کروڑ اور دوسری کی قیمت 17 کروڑ بتائی گئی ہے ۔

خلیجی ریاستوں کی جانب سے وزیراعظم شہباز شریف کو عمران خان سے زیادہ مہنگی گھڑیاں دی گئی ہیں۔

وزیراعظم نے قیمتی قلم، انگوٹھی، کف لنکس اورخوشبو کے بھی تمام تحائف توشہ خانے میں جمع کرا دئیے ہیں۔

واضح رہے کہ شہباز شریف بحیثیت وزیر اعلی پنجاب بھی 10 سال کے دوران ملنے والے تمام غیرملکی تحائف توشہ خانے میں جمع کرواتے رہے ہیں۔