چین نے اپنے پرانے حریف ملک تائیوان کو کھلے عام دھمکی دیدی۔ چینی وزیر دفاع نے خبردار کیا ہے کہ چین تائیوان کے خلاف جنگ چھیڑنے سے دریغ نہیں کرے گا۔
چین نے کہا ہے کہ اگر تائیوان آزادی کا اعلان کرتا ہے تو چین “جنگ شروع کرنے سے نہیں ہچکچائے گا”۔
چین کے وزیر دفاع وی فینگھے نے یہ بات اپنے امریکی ہم منصب کو جمعہ کو پہلی آمنے سامنے بات چیت میں خبردار کرتے ہوئے کہی۔
چینی وزارت دفاع کے مطابق، چینی وزیر دفاع نے کہا کہ چین ‘تائیوان کی آزادی’ کی کسی بھی سازش کو مکمل طور پر تباہ کر دے گا اور مادر وطن کے دوبارہ اتحاد کو مضبوطی سے برقرار رکھے گا۔
وزارت کے مطابق، “انہوں نے اصرار کیا کہ تائیوان چین کا ہے، چین کو کنٹرول کرنے کے لیے تائیوان کو استعمال کرنا کبھی کامیاب نہیں ہو گا۔”
امریکی محکمہ دفاع نے کہا کہ آسٹن نے سنگاپور میں بات چیت کے دوران اپنے چینی ہم منصب سے کہا کہ چین کو “ایسے اقدامات سے گریز کرنا چاہیے جو تائیوان کو مزید غیر مستحکم کریں۔”
خیال رہے کہ تائیوان خود کو ایک آزاد ملک تصور کرتا ہے۔ ساتھ ہی چین تائیوان کو اپنا حصہ سمجھتا ہے اور اپنی سفارت کاری کے تحت دوسرے ممالک کو تائیوان کو الگ سمجھنے سے روکتا ہے۔
