مہنگائی اس حکومت کی بداعمالیوں کی وجہ سے ہے ، سراج الحق

سراج الحق نے کہا کہ ہمارا کام صرف دنیاوی نہیں بلکہ دینی بھی ہے ، یہ دینی تحریک آپ کی رہنمائی چاہتی ہے ، ہم پیپلز پارٹی، ن لیگ کی طرح لوٹ کھسوٹ کے لیے نہیں آپ کی اصلاح کے لیے میدان عمل میں ہیں ، ہمارے اس کنونشن کا بنیادی مقصد ہے کہ یہ بیٹیاں بھی حضرت فاطمہؓ کی سیرت پر چلیں ، حضرت فاطمہؓ وہ ہستی ہیں جنہوں نے ہر مشکل وقت میں حضور اکرم ﷺ کے ساتھ رہیں ، غزوہِ احد کے مقام پر جب چند اصحاب باوفا موجود تھے تو آپ بھی ساتھ تھیں۔ انہوں نے کہا کہ غزوہِ احد میں حضور اکرم ﷺ بھی زخمی تھے ، حضرت علیؓ بھی زخمی تھے، حضرت فاطمہؓ آپ کی تیمار داری میں مگن تھیں ، دنیا ہالی ووڈ کے اداکاروں کو ماڈل سمجھتی ہے مگر خواتین کے لیے حضرت فاطمہؓ رول ماڈل ہیں ، ہمارے نوجوانوں کے رول ماڈل کوئی اور نہیں صرف امام حسن و امام حسین ہیں۔

امیر جماعت اسلامی سراج الحق نے کہا کہ مغربی این جی اوز ہمارا خاندانی نظام تباہ کرنے میں لگی ہوئی ہیں ، اسمبلی سے پاس ہونے والے بل کا مقصد بھی خاندانی نظام کو تباہ کرنا ہے ، ایک عورت کے حقوق کیلئے اللہ کے نظام کے علاوہ کون سا اچھا نظام ہے ، مغرب میں خاندانی نظام تباہ ہوگیا ہے ، یہ این جی اوز ابلیس کے چیلے ہیں ، یہ پاکستان کے خاندانی نظام کو تباہ کرنا چاہتی ہیں۔