کورونا وائرس کے نئے ویرینٹ ’’جے این 1‘‘کے پھیلائوکی نگرانی کی جارہی ہے ،سعودی پبلک ہیلتھ اتھارٹی

سعودی پبلک ہیلتھ اتھارٹی’’وقایہ‘‘نے کہا ہے کہ مقامی سطح پر کورونا وائرس کے نئے ویرینٹ ’’جے این 1‘‘کے پھیلائوکی نگرانی کی جارہی ہے ۔

 اتھارٹی نے کہا ہے کہ مملکت میں اس نئے وائرس کے پھیلنے کا تناسب 36 فیصد ریکارڈ کیا گیا ہے تاہم اس حوالے سے تشویش کی کوئی بات نہیں۔ ایسے مریضوں کی تعداد میں اضافہ نہیں ہوا جنہیں انتہائی نگہداشت کی ضرورت ہے۔

سعودی پبلک ہیلتھ اتھارٹی نے وائرس کے حوالے سے یہ اطمینان بھی دلایا کہ اگرچہ نیا وائرس تیزی سے دیگر ممالک میں پھیل رہا ہے تاہم اس حوالے سے تاحال کوئی ہنگامی صورتحال کا سامنا نہیں ہوا۔ دوسری جانب عالمی ادارہ صحت نے نئے پھیلنے والے وائرس’’جے این۔1 ‘ کو’’بی اے ۔2.86 ‘‘ویرینٹ کے سلسلے کی کڑی قراردیا ہے۔

عالمی ادارہ صحت ( ڈبلیو ایچ او) نے لوگوں کو خبردار کیا ہے کہ وہ احتیاطی تدابیر اختیار کریں کیونکہ یہ وائرس بھی تیزی سے ایک شخص سے دوسرے شخص میں منتقل ہوتا ہے۔ وائرس سے محفوظ رہنے کےلیے فیس ماسک کا استعمال کیا جائے اور ہاتھوں کی صفائی کا خاص خیال رکھا جائے تاکہ وائرس سے دوسرے متاثر نہ ہوں۔