اٹک پٹرولیم لمیٹڈ نے ہواوے ٹیکنالوجیز پاکستان پرائیویٹ لمیٹڈ اور اس کے پارٹنر اے ای پاور کے ساتھ مفاہمت کی یادداشت   پر دستخط کیے ہیں،

عسکر انٹرنیشنل رپورٹ
اسلام آباد، 17 اکتوبر:

پاکستان میں پائیدار اور ماحول دوست ٹرانسپورٹ کے فروغ کی جانب ایک اہم پیش رفت کے طور پر اٹک پٹرولیم لمیٹڈ نے ہواوے ٹیکنالوجیز پاکستان پرائیویٹ لمیٹڈ اور اس کے پارٹنر اے ای پاور کے ساتھ مفاہمت کی یادداشت   پر دستخط کیے ہیں، جس کے تحت ملک بھر میں الیکٹرک وہیکل   چارجنگ نیٹ ورک کے قیام کے لیے تعاون کیا جائے گا۔

یہ دستخطی تقریب اسلام آباد میں ہواوے کے دفتر میں منعقد ہوئی، جس کی رپورٹ گوادر پرو نے جمعہ کے روز جاری کی۔

معاہدے کے تحت تینوں ادارے ملک بھر میں جدید ترین ای وی چارجنگ اسٹیشنز کے قیام اور الیکٹرک موبلٹی کے فروغ کے لیے مشترکہ کوششیں کریں گے۔ اس شراکت داری کا مقصد پاکستان میں ایک صاف، توانائی مؤثر اور ماحول دوست ٹرانسپورٹیشن نظام قائم کرنا ہے، تاکہ کاربن کے اخراج میں کمی اور قومی گرین انرجی اہداف کو تقویت دی جا سکے۔

پاکستان میں الیکٹرک گاڑیوں کا شعبہ تیزی سے فروغ پا رہا ہے، اور عوامی و نجی دونوں شعبوں میں پائیدار ٹرانسپورٹ کے فروغ میں دلچسپی بڑھ رہی ہے۔ سرکاری اعدادوشمار کے مطابق، اب تک 3,800 سے زائد سرمایہ کاروں اور کمپنیوں نے ملک بھر میں ای وی چارجنگ اسٹیشنز قائم کرنے میں دلچسپی ظاہر کی ہے، جن میں سے 70 سے زیادہ لائسنس جاری کیے جا چکے ہیں اور متعدد اسٹیشنز فعال ہیں۔

حکومت کی قومی الیکٹرک وہیکل پالیسی (2025–2030) کے تحت 2030 تک 10,000 چارجنگ اسٹیشنز کے قیام کا ہدف مقرر کیا گیا ہے۔ اس پالیسی کے تحت سرمایہ کاری کے فروغ کے لیے بجلی کے نرخوں میں 44 فیصد تک رعایت بھی دی گئی ہے۔

صوبائی سطح پر بھی اقدامات جاری ہیں: پنجاب حکومت نے 2,000 چارجنگ اسٹیشنز اور 600 الیکٹرک بسوں کے منصوبے کا اعلان کیا ہے، جبکہ سندھ حکومت نے بڑی شاہراہوں پر ہر 50 کلومیٹر کے فاصلے پر چارجنگ اسٹیشن قائم کرنے کا منصوبہ بنایا ہے تاکہ بین الاضلاعی سفر میں سہولت فراہم کی جا سکے۔

حالیہ دنوں میں اسلام آباد میں ملک کا تیز ترین 120 کلوواٹ ای وی چارجنگ اسٹیشن بھی افتتاح کیا گیا ہے، جو صرف ایک گھنٹے میں گاڑی کو مکمل چارج کرنے کی صلاحیت رکھتا ہے۔

الیکٹرک گاڑیوں میں عوامی دلچسپی مسلسل بڑھ رہی ہے، خاص طور پر ای بائیکس، رکشاؤں اور دیگر دو یا تین پہیوں والی گاڑیوں کے صارفین میں، جبکہ نجی کاروں میں ای وی اپنانے کا رجحان بھی بتدریج بڑھ رہا ہے۔

اٹک پٹرولیم، ہواوے اور اے ای پاور کے درمیان یہ تعاون پاکستان کے لیے ایک صاف، سبز اور جدید توانائی کے مستقبل کی جانب اہم سنگ میل ثابت ہوگا، جو ملک کے پائیدار ترقی، اختراع اور ماحولیاتی بہتری کے اہداف سے ہم آہنگ ہے۔