تمام مذاہب کے لوگوں کو متحد کر کے عالمی امن قائم کیا جا سکتا ہے، کرسمس محبت، قربانی اور امن کا پیغام دیتا ہے، مشعال ملک

0

وزیر اعظم کی معاون خصوصی برائے انسانی حقوق و ترقی نسواں مشعال حسین ملک نے کہا ہے کہ تمام مذاہب کے لوگوں کو متحد کر کے عالمی امن قائم کیا جا سکتا ہے، کرسمس محبت، قربانی اور امن کا پیغام دیتا ہے ۔

ان خیالات کا اظہار انہوں نے جمعہ کو نظریہ پاکستان کونسل کے زیر اہتمام کرسمس کیک کاٹنے کی تقریب سے خطاب کرتے ہوئے کیا۔

انہوں نے مختلف مذہبی پس منظر رکھنے والے افراد کے درمیان ہم آہنگی اور افہام و تفہیم کو فروغ دینے کی اہمیت پر زور دیا۔فوکل پرسن سبین حسین ملک ، چیئرمین نظریہ پاکستان کونسل میاں جاوید ، ، ایگزیکٹو ممبر نظریہ پاکستان کونسل منظور مسیح ، فیصل زاہد ملک، برطانیہ میں پاکستان کے سابق ہائی کمشنر صلاح الدین ، نرگس اور خالد سلہری نے تقریب میں شرکت کی۔

مشعال حسین ملک نے کہا کہ ہر مذہب محبت، قربانی اور امن کا درس دیتا ہے ۔ انہوں نے کہا کہ ویٹی کن کے پوپ سے ملاقات میں انہوں نے کثیر العقیدہ ہم آہنگی عالمی امن کے لئے کلیدی قرار دیا۔انہوں نے کہا کہ کشمیر اور فلسطین سمیت عالمی تنازعات کا حل تمام مذاہب میں سرایت محبت، امن و ہم آہنگی کے پیغامات کی تبلیغ میں مضمر ہے۔

انہوں نے دنیا بھر میں مظلوموں کے ساتھ اظہار یکجہتی کی ضرورت پر زور دیا۔ مشعال ملک نے کہا کہ جڑانوالہ واقعہ کے بعد پاکستانی معاشرے کے تمام طبقات کی جانب سے متفقہ مذمت قابل تحسین ہے۔ انہوں نے واقعہ کے جواب میں حکومت کی طرف سے اٹھائے گئے اقدامات کی تعریف کی۔ انہوں نے سول سوسائٹی کے زیر اہتمام امن ریلیوں کی بھی تعریف کی اور ان اجتماعات میں عام شہریوں کی خاطر خواہ شرکت کو سراہا۔

مشعال ملک نے بھارت میں اقلیتوں پر روزانہ کی بنیاد پر ہونے والے ظلم و ستم پر گہری تشویش کا اظہار کیا۔ انہوں نے اس ظلم وستم کو ہندوستانی حکومت کے ہندوتوا سے متاثر پالیسیوں کے اثر و رسوخ سے منسوب کیا۔ انہوں نے غیر قانونی مقبوضہ جموں و کشمیر میں بھارت کی طرف سے مظالم اور انسانی حقوق کی خلاف ورزیوں کی طرف بھی توجہ دلائی۔

مشعال ملک نے قیام پاکستان کی جدوجہد میں مسیحی برادری کی انمول قربانیوں کو ذکر کیا۔ انہوں نے کشمیر کاز کی حمایت کے لئے ان کی لگن کی بھی داد دی۔ انہوں نے کہا کہ 25 دسمبر کا دن پاکستان کے لئے دو خوشیاں لاتا ہے، 25 دسمبر بابائے قوم محمد علی جناح کا جنم دن اور کرسمس کے تہوار کا دن ہے۔ مشعال ملک نے کیک کاٹ کر کرسمس کی تقریبات میں حصہ لیا اور سب کو کرسمس کی مبارکباد دی۔

Leave A Reply

Your email address will not be published.