ایشین گیمز: اسکواش میں پاکستان کی فتح کے بعد فائنل میں رسائی، دوسرا سلور میڈل یقینی ہوگیا

ایشین گیمز اسکواش ٹیم ایونٹ میں پاکستان نے ہانگ کانگ چائنا کو شکست دیکر فائنل کیلئے کوالیفائی کرلیا۔

ایشین گیمز ٹیم اسکواش ایونٹ کا سیمی فائنل پاکستان اور ہانگ کانگ چائنا کے درمیان کھیلا گیا، پہلے گیمز میں پاکستان کے نور زمان کو شکست ہوئی اور ہانگ کانگ کے کھلاڑی نے تین ایک سے کامیابی حاصل کی۔

دوسرے گیم میں پاکستان کے اشعب عرفان نے شاندار کھیل کا مظاہرہ کیا اور مخالف کھلاڑی کو تین صفر سے شکست دیکر مقابلہ ایک ایک سے برابر کردیا۔

ایشین گیمز: اسکواش میں پاکستان کی فتح کے بعد فائنل میں رسائی، دوسرا سلور میڈل یقینی ہوگیا
فوٹو: جیو نیوز
تیسرا گیم پاکستان کے ناصر اقبال اور ہانگ کانگ چائنا کے لائی چیوک میتھو کے درمیان ہوا جو دلچسپ و سنسنی خیز رہا۔

ناصر اقبال پہلا گیم بارہ دس سے ہار گئے لیکن پھر ناصر اقبال نے کم بیک کیا دوسرا اور تیسرا گیم گیارہ تین اور گیارہ نو سے جیت برتری حاصل کی۔

چوتھے گیمز میں مقابلہ انتہائی سنسنی خیز رہا، ناصر اقبال نے چودہ بارہ سے جیت کر پاکستان ٹیم کو فائنل میں پہنچا دیا۔

ایشین گیمز میں پاکستان کا دوسرا سلور میڈل یقینی ہوگیا جب کہ فائنل میں پاکستان کا مقابلہ ملائیشیا یا بھارت کی ٹیم سے ہوگا۔