اسلام آباد ایئرپورٹ پر اے این ایف کی بڑی کارروائی — برطانوی نژاد پاکستانی اسمگلر گرفتار، 15 کلو سے زائد منشیات برآمد

عسکر انٹرنیشنل رپورٹ

اسلام آباد، 16 اکتوبر :
اینٹی نارکوٹکس فورس (اے این ایف) نے اسلام آباد انٹرنیشنل ایئرپورٹ (IIAP) پر منشیات اسمگلنگ کی ایک بڑی کوشش ناکام بناتے ہوئے تھائی لینڈ سے آنے والے برطانوی نژاد پاکستانی شہری کو گرفتار کر لیا۔

تلاشی کے دوران اے این ایف اہلکاروں نے 11.182 کلوگرام ویڈ اور 3.616 کلوگرام کینابس برآمد کی جو مختلف اقسام کی پیکنگ میں مہارت سے چھپائی گئی تھی۔ برآمد شدہ منشیات کی مالیت تقریباً ایک کروڑ چھ لاکھ روپے بتائی جاتی ہے۔

ابتدائی تحقیقات میں ملزم نے انکشاف کیا کہ وہ یہ منشیات آزاد جموں و کشمیر (اے جے کے) اسمگل کرنے کا ارادہ رکھتا تھا۔ اس نے مزید بتایا کہ ڈھڈیال، آزاد کشمیر میں اس کا ایک ساتھی موجود ہے جو تعلیمی اداروں کے طلباء اور نوجوانوں کو منشیات فروخت کرتا ہے۔

ملزم کے خلاف انسداد منشیات ایکٹ 1997 کے تحت مقدمہ درج کر کے مزید تحقیقات شروع کر دی گئی ہیں۔

یہ گرفتاری اس بڑھتے ہوئے خطرے کی عکاسی کرتی ہے کہ ویڈ اور مصنوعی کینابس جیسے نشہ آور مادے جدید طرزِ زندگی کے بہانے نوجوان نسل کو نشانہ بنا رہے ہیں۔

اے این ایف نے اس عزم کا اعادہ کیا ہے کہ وہ منشیات سے پاک تعلیمی اداروں کے قیام کے لیے اپنی کوششیں جاری رکھے گی، اور انٹیلی جنس کی بنیاد پر کارروائیوں اور دیگر قانون نافذ کرنے والے اداروں کے اشتراک سے نوجوانوں کو منشیات کے مضر اثرات سے محفوظ رکھے گی۔