عالمی بینک کا داسو ہائیڈرو پاور منصوبے میں سماجی و ماحولیاتی پیشرفت پر اطمینان کا اظہار

خصوصی رپورٹ
اسلام آباد، 5 اکتوبر : عالمی بینک نے داسو ہائیڈرو پاور پروجیکٹ (ڈی ایچ پی پی) میں سماجی و ماحولیاتی بہتری اور ترقی پر اطمینان کا اظہار کرتے ہوئے کہا ہے کہ یہ منصوبہ پاکستان کے پائیدار ترقیاتی عزم اور چین کے ساتھ مضبوط شراکت داری کی علامت ہے۔

عالمی بینک کے سماجی و ماحولیاتی مشن کا وفد 29 ستمبر سے 2 اکتوبر 2025 تک اپر کوہستان کے دورے پر رہا، جس دوران منصوبے کی مختلف سرگرمیوں اور فیلڈ اقدامات کا جائزہ لیا گیا، گوادر پرو نے اتوار کو رپورٹ کیا۔

منصوبے کے ترجمان کے مطابق، وفد نے اب تک کی پیشرفت کو سراہتے ہوئے سماجی و ماحولیاتی وعدوں کو انجینئرنگ و تعمیراتی مراحل کے ساتھ مربوط رکھنے کی ہدایت دی۔

دورے کے دوران داسو پروجیکٹ کے سوشل ری سیٹلمنٹ اینڈ انوائرنمنٹ یونٹ نے مشیروں اور چینی کنٹریکٹرز کے ہمراہ وفد کو آبادکاری، ماحولیاتی تحفظات اور سماجی ترقیاتی اقدامات پر بریفنگ دی۔

وفد نے متاثرہ خاندانوں کی بروقت آبادکاری، مقامی آبادی سے مؤثر روابط اور ماحولیاتی نگرانی کو یقینی بنانے پر زور دیا۔

رپورٹ کے مطابق، اگست 2025 میں ڈپٹی کمشنر اپر کوہستان نے ای ایس ایم آر پروگرام کے تحت بے گھر خاندانوں میں معاوضے کے چیک تقسیم کیے۔ واپڈا نے مقامی ترقیاتی پروگرام (ایل اے ڈی پی) کے تحت 4 کروڑ روپے کے منصوبے بھی مختص کیے ہیں، جن میں تعلیم، صحت، بنیادی ڈھانچے اور روزگار کے مواقع شامل ہیں۔

چائنا گزوبا گروپ کمپنی (سی جی جی سی) 2017 سے منصوبے کی مرکزی تعمیراتی کمپنی ہے جو ڈیم، زیرِ زمین پاور ہاؤس اور شاہراہ کی منتقلی جیسے بڑے کام سرانجام دے رہی ہے۔

داسو منصوبہ چین-پاکستان توانائی تعاون کی ایک نمایاں مثال ہے جو صاف اور سستی بجلی فراہم کر کے شمالی پاکستان کے سماجی و معاشی منظرنامے کو تبدیل کرے گا۔