کوئٹہ( این این آئی)صوبائی وزیر تعلیم سردار یار محمد رند نے کہا ہے کہ وزیر اعلیٰ بلوچستان جام کمال خان کی تعلیمی وژن کو قدر کی نگاہ سے دیکھتا ہوں ہمیشہ عوامی فلاحی منصوبوں میں ان کے وژن کے ساتھ رہیں گے۔ انہوں نے کہا کہ پاکستان تحریک انصاف کا وژن تعلیم کی ترقی ہے۔ ملک بھر کی طرح بلوچستان کے نوجوانوں کو بھی ساتھ لے کر چلنا چاہتے ہیں۔ صوبے میں تعلیم کے فروغ کے لیے تمام وسائل بروئے کار لائے جائیں گے۔ خواہش ہے کہ میر چاکر رند ہائیر سیکنڈری سکول جیسے تعلیمی ادارے پورے بلوچستان میں قائم کیے جائیں۔جن میں قابل اور محنتی طلباء و طالبات کے لیے تمام سہولتیں موجود ہوں۔ صوبے کے تمام اضلاع میں ایسے ماڈل سکولز کا قیام عمل میں لایا جائے گا جہاں طلباء و طالبات کیلئے ہاسٹل اور بورڈنگ سمیت تمام بنیادی سہولیات موجود ہوں جنکے تمام تر اخراجات حکومت اٹھائے۔ ان خیالات کا اظہار انہوں نے یہاں کوئٹہ میں نجی چینل کو انٹرویو دیتے ہوئے کیا۔ صوبائی وزیر نے کہا کہ محکمہ تعلیم کا قلمدان چیلنج سمجھ کر قبول کیا۔ بلوچستان میں ٹیلنٹ کی کوئی کمی نہیں ہے فرق صرف مواقع ملنے کا ہے۔ بلوچستان کی ٹیلنٹ کو آگے لانے کیلیے اقدامات اٹھائے جائیں گے۔ چاہتے ہیں محکمہ کرپشن فری ہو۔ انہوں نے کہا کہ سفارش کلچر کی حوصلہ شکنی کی جائے گی۔ تعلیمی معیار کی بہتری اور صوبے میں فروغ تعلیم کے لیے تمام تر وسائل بروئے کار لائے جارہے ہیں۔ سردار یار محمد رند نے کہا کہ محکمہ تعلیم کو تجارت کا ذریعہ کہنا درست نہیں۔ سزا اور جزا کے نظام کو مزید موثر بنایا جائے گا انہوں نے کہا کہ اساتذہ کی تکریم پر کوئی حرف نہیں آنے دیا جائے گا۔
وزیر اعلیٰ بلوچستان کے تعلیمی ویژن کو قدر کی نگاہ سے دیکھتا ہوں ،ہمیشہ عوامی فلاحی منصوبوں میں انکے ویژن کے ساتھ رہیں گے،صوبائی وزیر تعلیم
