گورنر بلوچستان کی ہدایت: کوئٹہ میں گیس کی بلاتعطل فراہمی اور غیرقانونی کمپریسرز کے خلاف سخت کارروائی

عسکر انٹرنیشنل رپورٹ

کوئٹہ، 12 نومبر 2025

گورنر بلوچستان جعفر خان مندوخیل نے کوئٹہ شہر کے عوام کو مکمل پریشر کے ساتھ گیس کی فراہمی کی خصوصی ہدایت جاری کی ہے۔ انہوں نے سوئی سدرن گیس کمپنی کو ہدایت کی کہ عوامی شکایات کے ازالے کے لیے فوری اور ٹھوس عملی اقدامات کیے جائیں۔

انہوں نے زور دیا کہ سخت سردی کے موسم کے دوران گیس کی سپلائی بلاتعطل یقینی بنائی جائے اور رات دس بجے گیس بند کرنے کے بجائے اس میں مناسب توسیع کی جائے۔ گورنر نے غیرقانونی کمپریسرز لگانے اور مارکیٹ میں فروخت کرنے میں ملوث عناصر کے خلاف سخت قانونی کارروائی کی ہدایت بھی دی۔

یہ ہدایات گورنر ہاؤس کوئٹہ میں سوئی سدرن گیس کمپنی کی بریفنگ کے دوران جاری کی گئیں، جہاں جی ایم محمد راحیل ملک نے گورنر کو کمپنی کی کارکردگی اور جاری اقدامات سے آگاہ کیا۔ چیف منیجر بلنگ محمد عمران اعظم اور حافظ محمد یوسف بھی اس موقع پر موجود تھے۔

گورنر مندوخیل نے کہا کہ بلوں کی عدم ادائیگی سے نہ صرف اداروں کی کارکردگی متاثر ہوتی ہے بلکہ عام صارفین کو بھی مشکلات کا سامنا کرنا پڑتا ہے۔ انہوں نے عوام پر زور دیا کہ وہ واجب الادا بلوں کی ادائیگی میں حکومت کے ساتھ تعاون کریں تاکہ فراہمی کا نظام مستحکم اور شفاف بنایا جا سکے۔