وزیر اعلیٰ خیبر پختونخوا محمد سہیل آفریدی کا اسلام آباد بار سے خطاب: ملک کو سنگین سیاسی بحران، عدلیہ اور میڈیا کی آزادی کی ضرورت

عسکر انٹرنیشنل رپورٹ
اسلام آباد، 05 جنوری 2026:
خیبر پختونخوا کے وزیر اعلیٰ محمد سہیل آفریدی نے اسلام آباد بار کونسل سے خطاب میں کہا کہ ملک خطرناک موڑ پر کھڑا ہے اور موجودہ صورتحال آگے چل کر تباہ کن نتائج کا باعث

بن سکتی ہے۔ انہوں نے کہا کہ آزاد عدلیہ کے بغیر انصاف ممکن نہیں اور آئین کی بالادستی کے تحفظ کے لیے جدوجہد جاری رکھنا وقت کی سب سے اہم ضرورت ہے۔
آفریدی نے سیاسی مقدمات، بشمول عدت اور توشہ خانہ، کو تاریخ کے بدترین مقدمات قرار دیا اور کہا کہ یہ نہ صرف سابق وزیراعظم عمران خان بلکہ عدلیہ اور عوام کے ساتھ بھی کھلی زیادتی ہے۔ انہوں نے کہا کہ عمران خان جیل میں رہ کر قوم کی جدوجہد لڑ رہے ہیں اور ان کا مقصد اپنی رہائی نہیں بلکہ انصاف اور فیر ٹرائل کی بحالی ہے۔
وزیر اعلیٰ نے پاکستان تحریک انصاف کے کارکنوں پر تین سال سے جاری انتقامی اقدامات کی مذمت کی اور قوم سے اتحاد اور مزاحمت پر زور دیا۔ انہوں نے صحافیوں پر کارروائیوں کو آزادی اظہار پر حملہ قرار دیا اور کہا کہ آئینی ترامیم کے نام پر جبر روکنے کے لیے ہر با ضمیر شہری کو کھڑا ہونا ہوگا۔ آفریدی نے واضح کیا کہ مزاحمت زندہ ہے اور یہ آئین، عدلیہ اور نوجوانوں کی حمایت کے ساتھ جاری رہے گی۔