گورنر خیبر پختونخوا فیصل کریم کنڈی نے ڈیرہ اسماعیل خان، درابن اور کلاچی بارز کو مالی گرانٹ فراہم کی

عسکر انٹرنیشنل رپورٹ
ڈیرہ اسماعیل خان، 05 جنوری 2026:
گورنر خیبر پختونخوا فیصل کریم کنڈی نے ڈیرہ اسماعیل خان کا دورہ کیا اور وفاقی حکومت کی جانب سے ڈسٹرکٹ اور تحصیل بارز کے لیے مجموعی طور پر 45 لاکھ روپے کی مالی گرانٹ کے چیکس تقسیم کیے۔
تقریب کے دوران گورنر نے ڈیرہ اسماعیل خان بار کے صدر قیصر خان میانخیل ایڈوکیٹ کو 25 لاکھ روپے، تحصیل بار درابن کے صدر گل رحمان ایڈوکیٹ کو 10 لاکھ روپے اور تحصیل بار کلاچی کے صدر یاسر خان ایڈوکیٹ کو 10 لاکھ روپے کے چیک فراہم کیے۔
گورنر نے کہا کہ ان مالی گرانٹس سے تینوں بارز کے مالی مسائل کا خاتمہ ہوگا اور انہوں نے وفاقی حکومت اور وزارت قانون و انصاف کا شکریہ ادا کیا۔ انہوں نے مزید اعلان کیا کہ پروا اور پہاڑ پور بار ایسوسی ایشنز کو بھی جلد گرانٹ ان ایڈ کے چیکس فراہم کیے جائیں گے۔
فیصل کریم کنڈی نے کہا کہ وکلاء قانون کی بالادستی اور جمہوریت کو مضبوط کرنے میں کلیدی کردار ادا کرتے ہیں اور مظلوم طبقے کو قانونی معاونت فراہم کرنے میں ہمیشہ آگے رہتے ہیں۔ گورنر نے وکلاء کو ان کے خدمات اور قربانیوں پر مبارکباد دی اور کہا کہ یہ معاونت عدلیہ کی آزادانہ فعالیت اور عوام کے حقوق کے تحفظ کو یقینی بنانے میں مددگار ثابت ہوگی۔