کارپوریٹ فارمنگ، دریائے سندھ سے 6 نئی نہریں نکالنے، کسانوں کے معاشی قتلِ عام اور سندھ کے وسائل کی لوٹ مار کے خلاف سندھی ہاری تحریک اور عوامی تحریک کی جانب سے میرپور خاص میں احتجاجی ریلی نکالی گئی

کارپوریٹ فارمنگ، دریائے سندھ سے 6 نئی نہریں نکالنے، کسانوں کے معاشی قتلِ عام اور سندھ کے وسائل کی لوٹ مار کے خلاف سندھی ہاری تحریک اور عوامی تحریک کی جانب سے میرپور خاص میں احتجاجی ریلی نکالی گئی۔

عوامی تحریک کے مرکزی سینئر نائب صدر نور احمد کاتیار نے کہا کہ کارپوریٹ فارمنگ منصوبوں کے ذریعے کسانوں کا معاشی قتلِ عام کیا جا رہا ہے۔

سندھی ہاری تحریک کے مرکزی رہنما ڈاکٹر دلدار لغاری نے کہا کہ کارپوریٹ فارمنگ اور دریائے سندھ پر دھاوے ملکی سالمیت پر حملے ہیں۔

عوامی تحریک میرپور خاص کے صدر مختیار خاصخیلی نے کہا کہ ضلع میرپور خاص میں پانی کی قلت کے سبب فصلیں کاشت نہیں ہو سکیں۔ سندھ میں جان بوجھ کر قحط جیسی صورتحال پیدا کی جا رہی ہے۔

سندھی ہاری تحریک کے مرکزی سینئر نائب صدر علی نواز داہری نے کہا کہ پیپلز پارٹی نے آٹا، کپڑا اور مکان کا نعرہ دیا، لیکن گزشتہ 17 برس کے اقتدار میں ایک ایکڑ زمین بھی کسانوں کو نہیں دی۔

میرپور خاص (پریس ریلیز)
ملک دشمن کارپوریٹ فارمنگ منصوبوں، دریائے سندھ پر نئی نہریں نکالنے اور کسانوں پر ہونے والے ظلم و ستم کے خلاف سندھی ہاری تحریک اور عوامی تحریک کی جانب سے میرپور خاص میں اسٹیٹ لائف سے پریس کلب تک احتجاجی ریلی نکالی گئی۔
ریلی کی قیادت عوامی تحریک کے مرکزی سینئر نائب صدر نور احمد کاتیار، سندھی ہاری تحریک کے مرکزی رہنما ڈاکٹر دلدار لغاری، عوامی تحریک میرپور خاص کے صدر مختیار خاصخیلی، سندھی ہاری تحریک کے مرکزی سینئر نائب صدر علی نواز دہریا، سندھی ہاری تحریک میرپور خاص کے صدر کامریڈ شگن کولہی اور دیگر رہنماؤں نے کی۔
احتجاجی ریلی سے خطاب کرتے ہوئے رہنماؤں نے کہا کہ کارپوریٹ فارمنگ منصوبے اور دریائے سندھ پر پنجاب کے حکمرانوں کے قبضے ملکی سالمیت پر حملہ ہیں۔ بھاشا ڈیم کے لیے بجٹ میں رقم مختص کرنا سندھ دشمنی ہے۔
عوامی تحریک کے مرکزی سینئر نائب صدر نور احمد کاتیار نے کہا کہ ملک میں بدترین حالات پیدا کیے گئے ہیں۔ مظلوم قوموں کے وسائل چھیننے سے ملک ترقی نہیں کرے گا۔ کارپوریٹ فارمنگ منصوبوں کے ذریعے سندھ سمیت مظلوم قوموں کے وسائل پر ناجائز قبضہ کیا جا رہا ہے، یہ منصوبے کسانوں کا قتلِ عام ہیں۔ پنجاب کے حکمران دریائے سندھ پر قبضے کر رہے ہیں اور سندھ کو فتح شدہ علاقہ سمجھتے ہیں۔ انہوں نے کہا کہ پنجاب کے حکمرانوں نے بانی پاکستان قائد اعظم محمد علی جناح سے غداری کی ہے۔
سندھی ہاری تحریک کے مرکزی رہنما ڈاکٹر دلدار لغاری نے کہا کہ کارپوریٹ فارمنگ منصوبوں کے ذریعے کسانوں کو بےدخل کیا جا رہا ہے۔ ملک میں کسانوں کے ساتھ بدترین سلوک کیا جا رہا ہے اور انہیں ان کے حقوق سے محروم رکھا جا رہا ہے۔ لیبر کوڈ جیسے کالے قوانین لا کر کسانوں کو بدترین غلامی کی زنجیروں میں جکڑا جا رہا ہے۔
سندھی ہاری تحریک کے مرکزی سینئر نائب صدر علی نواز داہری نے کہا کہ پیپلز پارٹی نے آٹا، کپڑا اور مکان کا نعرہ دیا لیکن گزشتہ 17 سال میں کسانوں کو ایک ایکڑ زمین بھی نہیں دی۔ پیپلز پارٹی وڈیروں، سرداروں، جاگیرداروں، میروں اور پیروں کی جماعت ہے جو کسانوں اور غریب عوام کا خون چوس رہی ہے۔
عوامی تحریک میرپور خاص کے صدر مختیار خاصخیلی اور سندھی ہاری تحریک میرپور خاص کے صدر کامریڈ شگن کولہی نے کہا کہ پانی کی مصنوعی قلت کے باعث ضلع میرپور خاص میں کپاس اور دیگر فصلیں نہیں لگ سکیں۔ سندھ کے حکمران، پنجاب کے حکمرانوں کے ساتھ دریائے سندھ پر قبضوں میں برابر کے شریک ہیں۔ سندھ میں جان بوجھ کر قحط جیسی صورتحال پیدا کی جا رہی ہے۔
رہنماؤں نے کہا کہ کارپوریٹ فارمنگ منصوبوں، دریائے سندھ پر قبضوں اور وسائل کی لوٹ مار کے خلاف عوامی تحریک اور سندھی ہاری تحریک کی جدوجہد دشمن قوتوں کی شکست تک جاری رہے گی۔

مرکزی پریس سیکریٹری
عوامی تحریک