وفاقی وزیر داخلہ سے امریکی وفد کی ملاقات،مستقبل میں ہر سطح پر پاک امریکاتعاون مضبوط بنانے کے لیے کوآرڈینیشن بہتر بنانے کا فیصلہ، ?بیرون ملک جرائم میں ملوث افراد کی نشاندہی جدید سافٹ ویئر کے ذریعے کی جائے گی، محسن نقوی

اسلام آباد۔17جنوری  وفاقی وزیر برائے داخلہ و نارکاٹکس کنٹرول محسن نقوی نے کہا ہے کہ مستقبل میں ہر سطح پر پاک امریکا تعاون کا استحکام و کوآرڈینیشن میں بہتری اور بیرون ملک جرائم میں ملوث افراد کی نشاندہی جدید سافٹ ویئر کے ذریعے کی جائے گی،امریکی اداروں اینٹی ٹیررسٹ اسسٹنٹس پروگرام اور بیورو آف انٹرنیشنل نارکاٹکس اینڈ لا انفورسمنٹ کے ساتھ جاری تعاون کو مزید وسعت دی جائے گی۔یہ بات انہوں نے امریکی سفیر نیٹلی بیکر کی سربراہی میں اعلی ٰسطح کے وفد سے ملاقات کے دوران کہی۔ اس موقع پر پاک امریکا تعلقات اور مشترکہ مفادات کے شعبوں میں تعاون بڑھانے بارے تفصیلی تبادلہ خیال کیا گیا۔ وزارت داخلہ کے مطابق ملاقات کے دوران دوطرفہ سکیورٹی تعاون و بارڈر مینجمنٹ کے ضمن میں اشتراک میں اضافے سمیت امریکی اداروں اینٹی ٹیررسٹ اسسٹنٹس پروگرام اور بیورو آف انٹرنیشنل نارکوٹکس اینڈ لا انفورسمنٹ کے ساتھ جاری تعاون مضبوط بنانے پر اتفاق اور مستقبل میں ہر سطح پر پاک امریکا تعاون مضبوط بنانے کے لیے کوآرڈینیشن بہتر بنانے کا بھی فیصلہ کیا گیا۔ وفاقی وزیر داخلہ نے کہا کہ بیرون ملک جرائم میں ملوث افراد کی نشاندہی جدید سافٹ ویئر کے ذریعے کی جائے گی۔ ملاقات میں ایف آئی اے، فیڈرل کانسٹیبلری اور سائبر کرائم ایجنسی کے افسران کے لئے ٹریننگ پروگرامز، امریکا کے تعاون سے ایف آئی اے میں سنٹر فار ٹرانسفارمیشن کرائم اور اکیڈمی کے قیام کے امور بارے بھی بات چیت ہوئی جس میں اتفاق کیا گیا کہ بارڈر سکیورٹی،کوسٹل گارڈز اور دیگر اداروں کو جدید امریکی آلات سے لیس کیا جائے گا۔ وزیر داخلہ محسن نقوی نے کہا کہ جدید آلات سے بارڈر سکیورٹی اور کوسٹل گارڈز کی استعداد کار میں اضافہ ہوگا،فیڈرل کانسٹیبلری کی تنظیم نو،ایف آئی اے اور این سی سی آئی اےکی استعداد کار بڑھانے میں امریکی تعاون کا خیر مقدم کریں گے۔ان کا کہنا تھا کہ ایف آئی اے کے انسداد دہشت گردی ونگ کو فعال کرنے کے لیے امریکی معاونت بہت فائدہ مند ثابت ہو گی اور یہ وفاقی سطح پر پہلا اینٹی ٹیررسٹ ونگ ہوگا جو صوبوں کے ساتھ موثر کوآرڈینیشن رکھے گا۔ وزیر داخلہ محسن نقوی نے کہا کہ این سی سی آئی اے ملک بھر میں غیرقانونی کال سینٹرز کے خلاف بھرپور کریک ڈا ¶ن کررہی ہے۔ انہوں نے کہا کہ مالیاتی فراڈ اور دہشت گردی کی فنڈنگ کی روک تھام کےلئے جدید سافٹ ویئر وقت کی ضرورت ہے اور اس ضمن میں امریکا کا این سی سی آئی اے کے ساتھ اشتراک کار انتہائی ضروری ہے۔ امریکی وفد نے سکیورٹی تعاون اور دوطرفہ روابط بڑھانے کے لئے پاکستان کی کاوشوں کی تعریف کی۔قائم مقام امریکی سفیر نے وزارت داخلہ اور امریکی اداروں کے درمیان مختلف سطح پر جاری تعاون کو سراہا۔ انہوں نے کہا کہ پاکستان کے ساتھ دوطرفہ اشتراک بڑھانے کے لئے اقدامات جاری رکھیں گے۔ وزیر مملکت برائے داخلہ طلال چوہدری، وفاقی سیکرٹری داخلہ، ڈی جی ایف آئی اے، کمانڈنٹ فیڈرل کانسٹیبلری، ایڈیشنل سیکرٹری داخلہ، ڈی جی نیشنل سائبر کرائمز انویسٹی گیشن ایجنسی،ڈی جی پاسپورٹ اینڈ امیگریشن، آئی جی اسلام آباد پولیس اور دیگر اعلیٰ حکام بھی اس موقع پر موجود تھے