مویشیوں کی بڑھتی ہوئی قیمتیں قربانی کو مشکل بنا رہی ہیں: عبدالحاکم قائد

مویشیوں کی بڑھتی ہوئی قیمتیں قربانی کو مشکل بنا رہی ہیں: عبدالحاکم قائد

کراچی 4جون (پی پی آئی) مویشیوں کی بڑھتی ہوئی قیمتوں نے قربانی جیسے اہم فریضہ کو مشکل بنا دیا ہے۔ پاسبان ڈیموکریٹک پارٹی کراچی کے صدر، عبدالحاکم قائد نے حکومت سے مطالبہ کیا ہے کہ وہ جانوروں کی قیمتوں پر کنٹرول کے لیے فوری طور پر مؤثر اقدامات کرے۔

انہوں نے تجویز دی کہ طلب اور رسد کے مطابق قیمتوں کا تعین کیا جائے اور ان قوتوں کی حوصلہ شکنی کی جائے جو مارکیٹ میں خرابی کا باعث بنتی ہیں۔ عبدالحاکم قائد نے سرکاری مویشی منڈیاں قائم کرنے کی تجویز بھی دی، جہاں مناسب نرخوں پر جانور دستیاب ہوں۔

بیوپاریوں کی ناجائز منافع خوری پر کڑی نظر رکھنے کی ضرورت پر زور دیتے ہوئے، انہوں نے سڑکوں اور داخلی راستوں پر موجود غیر قانونی چیک پوسٹس کے خاتمے کا مطالبہ کیا۔ قائد نے کہا کہ بیوپاریوں کو تحفظ فراہم کیا جائے تاکہ وہ بلا خوف و خطر جانور منڈیوں تک پہنچا سکیں۔

انہوں نے نشاندہی کی کہ مویشیوں کو منڈیوں تک پہنچانے کا راستہ بیوپاریوں کے لیے ایک کٹھن آزمائش بن چکا ہے، جہاں جگہ جگہ ناکوں پر انہیں روکا جاتا ہے اور غیر قانونی بھتے وصول کیے جاتے ہیں۔ انہوں نے اس عمل کو قانون کی صریح خلاف ورزی قرار دیتے ہوئے کہا کہ یہ قربانی کے جانوروں کی قیمتوں میں اضافے کا باعث بنتا ہے، جس کا بوجھ عام شہری پر پڑتا ہے۔

عبدالحاکم قائد نے کہا کہ قربانی جیسی عبادت بھی بھتہ خوری اور رشوت سے محفوظ نہیں ہے۔ مویشی کے بیوپاری سارا سال جانور پال کر جو منافع نہیں کما پاتے، وہ رشوت خور مافیہ چند دنوں میں حاصل کر لیتے ہیں۔ انہوں نے حکومت سے اپیل کی کہ وہ ان مسائل کو جلد از جلد حل کرے تاکہ قربانی کے فریضے کو آسان بنایا جا سکے۔