عمرگل اور سعید اجمل کو پاکستانی کرکٹ ٹیم کا فاسٹ اورسپن بولنگ کوچ مقرر کر دیا گیا، پی سی بی ترجمان

:پاکستان کرکٹ ٹیم کے سابق کھلاڑی عمرگل اور سعید اجمل کو قومی ٹیم کا بالترتیب فاسٹ اور سپن بولنگ کوچ مقرر کردیا گیا ہے۔ان دونوں کی پہلی اسائنمنٹ آسٹریلیا میں ٹیسٹ سیریز اور نیوزی لینڈ میں ٹی ٹونٹی سیریز ہوگی۔

پاکستان کرکٹ بورڈ (پی سی بی )کے ترجمان کے مطابق عمرگل اس سے قبل افغانستان کے خلاف تین میچوں کی ٹی ٹونٹی سیریز میں بولنگ کوچ کی ذمہ داری نبھاچکے ہیں اس کے علاوہ وہ گزشتہ سال ٹی ٹونٹی ورلڈ کپ میں افغانستان کی کرکٹ ٹیم کے بولنگ کوچ اور پی ایس ایل میں کوئٹہ گلیڈی ایٹرز کے بولنگ کوچ بھی رہ چکے ہیں۔

عمرگل نے2003 میں شروع ہونے والے اپنے شاندار انٹرنیشنل کریئر میں47 ٹیسٹ میچوں میں 163وکٹیں لی ۔130 ون ڈے انٹرنیشنل میں 179وکٹیں اور60 ٹی ٹونٹی انٹرنیشنل میں85 وکٹیں حاصل کی ہیں۔سابق عالمی نمبر ون ڈے انٹرنیشنل بولر سعید اجمل بھی آسٹریلیا اور نیوزی لینڈ کے دورہ میں اپنی ذمہ داریاں شروع کریں گے۔انہوں نے 2008میں اپنے بین الاقوامی کریئر کا آغاز کیا۔اور انٹرنیشنل کریئر میں 35 ٹیسٹ113 ون ڈے اور 64 ٹی ٹوئنٹی انٹرنیشنل میں مجموعی طور پر447 وکٹیں حاصل کیں ۔وہ پی ایس ایل میں اسلام آباد یونائیٹڈکے سپن بولنگ کوچ بھی رہ چکے ہیں۔

عمرگل نے اپنی تقرری کو اعزاز سمجھتے ہوئے پاکستان کرکٹ بورڈ کی منیجمنٹ کمیٹی کے چیرمین ذکا اشرف کا شکریہ اداکیا ہے اور کہا ہے کہ پاکستانی ٹیم کے ساتھ اپنے سابقہ تجربے کی روشنی میں وہ کوچنگ کی مہارت کو بروئے کار لاتے ہوئے وہ ٹیم کی بولنگ کو نئی بلندیوں تک پہنچانے کی کوشش کریں گے۔

سعید اجمل نے بھی کہا ہے کہ یہ ذکا اشرف کے شکرگزار ہیں کہ انہوں نے اس ذمہ داری کے لیے انہیں موقع فراہم کیا۔وہ پاکستانی ٹیم میں سپن بولنگ کی ترقی کے لیے اپنا کردار ادا کرنے میں خوشی محسوس کرتے ہیں اور امید کرتے ہیں کہ ان کا کریئر اور تجربہ ٹیم میں سپن بولنگ کو آگے بڑھانے میں مدد گار ثابت ہوگا۔