پنجاب میں 1075 ٹریفک حادثات، 15 افراد جاں بحق اور 1193 زخمی

لاہور: ایمرجنسی سروسز ڈیپارٹمنٹ (ریسکیو 1122) کے مطابق گزشتہ 24 گھنٹوں کے دوران پنجاب کے مختلف اضلاع میں 1075 ٹریفک حادثات رپورٹ ہوئے، جن میں 15 افراد جاں بحق اور 1193 زخمی ہوئے۔
ذرائع کے مطابق 465 شدید زخمیوں کو فوری طور پر نزدیکی ضلعی اور تحصیل کے ہسپتالوں منتقل کیا گیا، جبکہ 728 معمولی زخمیوں کو موقع پر ریسکیو میڈیکل ٹیموں نے طبی امداد فراہم کی، جس سے ہسپتالوں پر بوجھ کم ہوا۔
اعداد و شمار سے پتہ چلتا ہے کہ 71 فیصد حادثات موٹر سائیکل سے متعلق تھے، جس کے باعث ٹریفک قوانین کی پابندی اور لین کے نظم و ضبط پر سختی سے عمل در آمد ضروری ہے۔
زخمیوں میں 723 ڈرائیورز، 59 کم عمر ڈرائیورز، 344 مسافر اور 141 پیدل افراد شامل ہیں۔ لاہور سب سے زیادہ متاثر ہوا جہاں 217 حادثات رپورٹ ہوئے، اس کے بعد ملتان میں 74 اور فیصل آباد میں 73 حادثات ہوئے۔
ریسکیو 1122 نے شہریوں سے اپیل کی ہے کہ وہ ٹریفک قوانین پر عمل کر کے اپنی اور دوسروں کی جانیں بچائیں۔