شاہ اردن عبداللہ دوم کا وفد کے ہمراہ گلوبل انڈسٹری اینڈ ڈیفنس سلوشنز کا دورہ، فیلڈ مارشل عاصم منیر نے استقبال کیا

راولپنڈی۔16نومبر ہاشمی سلطنت اردن کے فرمانروا اور اردن کی مسلح افواج کے سپریم کمانڈر شاہ عبداللہ دوم ابن الحسین نے اپنی صاحبزادی شہزادی سلمہ بنت عبداللہ دوم اور اردن کے سول و عسکری حکام پر مشتمل وفد کے ہمراہ گلوبل انڈسٹریل اینڈ ڈیفنس سلوشنز (جی آئی ڈی ایس) سنٹر کا دورہ کیا، فیلڈ مارشل سید عاصم منیر، نشان امتیاز، ہلال جرات ، چیف آف آرمی سٹاف نے دیگر سینئر افسران کے ہمراہ شاہی مہمانوں کی آمد پر پرتپاک استقبال کیا۔ پاک فوج کے شعبہ تعلقات عامہ (آئی ایس پی آر) کے مطابق دورے کے دوران شاہ اردن کو جی آئی ڈی ایس کی ساخت، صلاحیتوں اور مصنوعات کے پورٹ فولیو پر جامع بریفنگ دی گئی۔ اس بریفنگ میں پاکستان کی مقامی دفاعی پیداوار، تکنیکی جدت جبکہ پاکستان اور اردن کے درمیان دوطرفہ دفاعی تعاون کے ممکنہ مواقع پر پیشرفت کو اجاگر کیا گیا۔بعد ازاں شاہ عبداللہ دوم نے ٹلہ فیلڈ فائرنگ رینج کا بھی دورہ کیا۔ وزیر اعظم محمد شہباز شریف نے بھی اس موقع کو رونق بخشی۔جمہوریہ آذربائیجان کے وزیر دفاعی صنعت وُوگر ویلہ اوغلو مصطفائیف بھی فائرنگ رینجز پر معزز مہمانوں میں شامل تھے۔شاہ اردن اور معزز مہمانوں نے ایک مشترکہ فائر اینڈ مینیور (فائرنگ اور حرکات)کا مشاہدہ کیا۔ اس مشق میں کثیرالجہت آپریشنز کا مظاہرہ کیا گیاجن میں روایتی اور فضائی فائر پاور، ہم آہنگ حرکات اور اسپیکٹرم وارفیئر کی صلاحیتیں شامل تھیں، جنہوں نے مختلف انواع اور کثیرالمقاصد ڈرونز کا عملی مظاہرہ کیا۔شاہ عبداللہ دوم نے مشق میں شامل دستوں اور فضائی عملے کے اعلیٰ معیار کی تربیت، پیشہ ورانہ صلاحیت، قابلیت اور حربی تیاریوں کی تعریف کی۔ اس موقع پر وزیراعظم محمد شہباز شریف نے شاہ عبداللہ دوم اور اردن کے عوام کے لیے پاکستان کی جانب سے دلی احترام اور والہانہ جذبات کا اظہار کیا اور کہا کہ یہ دورہ دونوں ممالک کے درمیان پائیدار دوستی، باہمی اعتماد اور امن و ترقی کے مشترکہ جذبے کی عکاسی کرتا ہے۔دورے کے دوران فیلڈمارشل سیدعاصم منیر نے پاکستان اور اردن کے درمیان مضبوط دفاعی شراکت داری پر زور دیا۔ فیلڈ مارشل نے اردن کے ساتھ فوجی تعاون کو مزید بڑھانے ، مستحکم اور پرامن خطے کے باہمی وژن کو مشترکہ طور پر حاصل کرنے کے پاکستان کے عزم کی تجدید کی۔ قبل ازیں شاہ اردن نے فیلڈمارشل کو ہاشمی سلطنت اردن اور پاکستان کے درمیان دفاعی تعاون کو مضبوط بنانے میں ان کی شاندار خدمات اور نمایاں شراکت کے اعتراف میں ‘آرڈر آف ملٹری میرٹ آف فرسٹ ڈگری’ سے نوازا۔ شاہ عبداللہ دوم کا پاکستان کا دورہ پاکستان اور ہاشمی سلطنت اردن کے درمیان برادرانہ اور بھائی چارے پر مبنی تاریخی تعلقات کو مضبوط بنانے میں اہم سنگ میل ثابت ہو رہا ہے۔