اسلام آباد میں غیر قانونی پارکنگ کے خلاف بھرپور کریک ڈاؤن — خلاف ورزی کرنے والوں کے خلاف سخت کارروائی کا حکم

عسکر انٹرنیشنل رپورٹ

اسلام آباد، 9 نومبر :
اسلام آباد ٹریفک پولیس نے وفاقی دارالحکومت میں غیر قانونی پارکنگ کے خلاف بڑے پیمانے پر کریک ڈاؤن شروع کر دیا ہے، جس کے تحت نو پارکنگ زونز اور فٹ پاتھوں پر رکاوٹیں کھڑی کرنے والے ڈرائیوروں کے خلاف سخت کارروائی کے لیے خصوصی ٹیمیں تعینات کر دی گئی ہیں۔

یہ اقدام انسپکٹر جنرل پولیس سید علی ناصر رضوی کی خصوصی ہدایت پر کیا گیا ہے تاکہ ٹریفک کی روانی برقرار رہے، شہری نظم و ضبط بہتر ہو، اور ٹریفک قوانین پر مؤثر عمل درآمد کو یقینی بنایا جا سکے۔

شاپنگ مالز، بازاروں، تجارتی مراکز اور مرکزی شاہراہوں پر پارکنگ کی خلاف ورزیوں کی نگرانی کے لیے خصوصی یونٹس تشکیل دیے گئے ہیں۔

چیف ٹریفک آفیسر، کیپٹن (ر) حمزہ ہمایوں نے تمام زونل ڈی ایس پیز کو ہدایت کی ہے کہ ٹریفک قوانین پر سختی سے عمل درآمد کرایا جائے اور ٹریفک نظام میں خلل ڈالنے والے عناصر کے خلاف بلا امتیاز کارروائی کی جائے۔

انہوں نے واضح کیا کہ فٹ پاتھ صرف پیدل چلنے والوں کے لیے مخصوص ہیں اور ان پر کسی بھی قسم کی غیر قانونی پارکنگ یا رکاوٹ برداشت نہیں کی جائے گی۔

ٹریفک پولیس نے شہریوں سے اپیل کی ہے کہ وہ ٹریفک قوانین پر عمل پیرا ہو کر ایک منظم اور محفوظ سفری نظام کے قیام میں تعاون کریں۔