وزیراعلیٰ خیبرپختونخوا نے بی آر ٹی کو جمرود اور باڑہ بازار تک توسیع دینے کا اعلان، عوام سے ملاقات کے دوران سروس کا خود جائزہ لیا

پشاور، 9 نومبر 2025: وزیراعلیٰ خیبرپختونخوا، محمد سہیل آفریدی نے بس ریپڈ ٹرانزٹ (بی آر ٹی) سروس کو ضلع خیبر کے جمرود ٹیڈی بازار اور باڑہ بازار تک توسیع دینے کا اعلان کیا۔ وزیراعلیٰ نے بی آر ٹی کو اپنے رہنما عمران خان کی جانب سے عوام کے لیے ایک تحفہ قرار دیا اور کہا کہ یہ نظام غریب اور متوسط طبقے کے لیے بہترین، سستا اور معیاری سفری سہولت فراہم کر رہا ہے۔

انہوں نے کہا، “بی آر ٹی بسوں میں رش کم کرنے کے لیے 50 نئی بسیں خریدی گئی ہیں اور مزید 50 بسیں جلد شامل کی جائیں گی۔ اس کے علاوہ سروس کو دیگر علاقوں تک بھی توسیع دی جائے گی تاکہ زیادہ سے زیادہ لوگ اس سے مستفید ہوں۔”

اتوار کے روز وزیراعلیٰ نے یونیورسٹی آف پشاور بی آر ٹی اسٹیشن کا دورہ کیا اور کارخانو اسٹیشن تک بس میں سفر کیا۔ اس دوران انہوں نے شہریوں سے براہ راست ملاقات کی اور سروس کے بارے میں فیڈبیک حاصل کیا۔ شہری وزیراعلیٰ سے مل کر خوشی کا اظہار کرتے رہے اور سیلفیاں بنائیں۔

کارخانو اسٹیشن پر میڈیا سے گفتگو کرتے ہوئے وزیراعلیٰ نے کہا، “میری خواہش تھی کہ میں خود بی آر ٹی میں سفر کرکے عوام سے براہ راست فیڈبیک حاصل کروں اور اس فیڈبیک کی روشنی میں سروس کو مزید بہتر بنایا جائے۔”

آئینی ترمیم سے متعلق ایک سوال کے جواب میں وزیراعلیٰ نے کہا کہ 27ویں آئینی ترمیم جمہوریت کے اصولوں کے خلاف ہے۔ موجودہ حکومت کے پاس صرف 17 نشستیں ہیں، لہٰذا عوامی مینڈیٹ یا ترمیم کا اختیار موجود نہیں۔

وزیراعلیٰ نے مزید اعلان کیا کہ 12 نومبر کو امن جرگہ منعقد کیا جائے گا جس میں پارلیمنٹرینز، سابق اراکین اسمبلی اور سیاسی جماعتوں کے رہنما مدعو ہوں گے تاکہ دہشت گردی کے خاتمے اور مستقل امن و امان کے لیے حکمت عملی وضع کی جا سکے۔