پی ٹی وی قومی براڈ کاسٹر ہے، پی ٹی وی نے 59 سال میں شاندار سفر طے کیا، نگران وفاقی وزیر اطلاعات مرتضیٰ سولنگی کا پی ٹی وی کی 59 ویں سالگرہ کی تقریب سے خطاب

نگران وفاقی وزیر اطلاعات، نشریات و پارلیمانی امور مرتضیٰ سولنگی نے پاکستان ٹیلی ویژن کی 59 ویں سالگرہ پر پی ٹی وی کے ملازمین کو مبارکباد پیش کرتے ہوئے کہا ہے کہ پی ٹی وی قومی براڈ کاسٹر ہے جس نے 59 سال میں شاندار سفر طے کیا۔

یہ بات انہوں نے اتوار کو یہاں پی ٹی وی کی 59 ویں سالگرہ کی تقریب سے خطاب کرتے ہوئے کہی۔ اس موقع پر وزیراعلیٰ پنجاب محسن نقوی بھی موجود تھے۔

تقریب سے خطاب کرتے ہوئے مرتضیٰ سولنگی نے کہا کہ پی ٹی وی پاکستان کا قومی براڈ کاسٹر ہے، 59 سال قبل لاہور میں میرے استاد اسلم اظہر نے ایک پرانی عمارت کے لان میں ٹینٹ لگا کر پی ٹی وی کی نشریات کا آغاز کیا۔

اس موقع پر انہوں نے تقریب میں موجودنگران وزیراعلیٰ پنجاب محسن نقوی کا خیرمقدم کرتے ہوئے کہا کہ نگران وزیراعلیٰ پنجاب محسن نقوی خود براڈ کاسٹر اور صحافی رہے ہیں، انہوں نے یہ سفر خود بھی دیکھا ہے، پنجاب میں ہونے والی تبدیلیوں کے باعث اب وہ ہر ایک کو محسن لگ رہے ہیں۔ انہوں نے کہا کہ پنجاب میں جتنی تبدیلیاں دیکھی ہیں لگتا ہے وہ پنجاب کے شیر شاہ سوری بن جائیں گے۔