بلوچستان کے ضلع دکی میں تعمیراتی کمپنی کے 18 مزدور اغوا، گارڈ شہید

فتنہ الہندوستان نے بلوچستان میں معاشی ترقی کا راستہ روکنے کی مذموم کوشش کرتے ہوئے دکی میں 18 تعمیراتی مزدور اغوا کر لیے، ایک گارڈ شہید اور ایک زخمی ہو گیا۔

ذرائع کے مطابق فتنہ الہندوستان کے دہشت گردوں نے ضلع دُکّی کے علاقے نانا صاحب زیارت میں سڑک تعمیر کرنے والی کمپنی کے کیمپ پر حملہ کر دیا۔

ذرائع نے مزید بتایا کہ دہشت گردوں سے فائرنگ کے تبادلے میں ایک گارڈ شہید جبکہ ایک شدید زخمی ہو گیا، حملے کے بعد دہشت گردوں نے کیمپ میں مقیم سڑک تعمیر کرنے والے 18 مزدوروں کو اغوا کر لیا۔

ذرائع نے بتایا کہ سکیورٹی فورسز نے علاقے میں مغوی مزدوروں کی بازیابی اور دہشت گردوں کی تلاش میں سرچ آپریشن شروع کر دیا ہے۔

دُکی بلوچستان کے دارالحکومت کوئٹہ سے تقریباً 315 کلومیٹر شمال مشرق میں واقع ہے۔