بین الاقوامی انسدادِ بدعنوانی دن کے موقع پر اینٹی کرپشن مکران ڈویژن کے زیرِ اہتمام پاک–چائنا ٹیکنیکل سینٹر کے آڈیٹوریم میں ایک شاندار آگاہی سیمینار منعقد ہوا

گوادر: بین الاقوامی انسدادِ بدعنوانی دن کے موقع پر اینٹی کرپشن مکران ڈویژن کے زیرِ اہتمام پاک–چائنا ٹیکنیکل سینٹر کے آڈیٹوریم میں ایک شاندار آگاہی سیمینار منعقد ہوا، جس میں ضلعی انتظامیہ، پولیس، اساتذہ، طلباء، سرکاری اداروں کے نمائندگان اور سول سوسائٹی کے اراکین نے بھرپور شرکت کی۔ اس بھرپور حاضری نے تقریب کو ایک نمایاں اور ہمہ گیر ایونٹ کی حیثیت عطا کی۔
تقریب کی صدارت ڈپٹی ڈائریکٹر اینٹی کرپشن مکران ڈویژن فرید سخی نے کی۔ اپنے افتتاحی خطاب میں انہوں نے کرپشن کے معاشی، سماجی اور ادارہ جاتی اثرات پر روشنی ڈالتے ہوئے کہا کہ بدعنوانی ترقی کی راہ میں سب سے بڑی رکاوٹ ہے، جو ناانصافی، بے اصولی اور معاشی ناہمواری کو جنم دیتی ہے۔ انہوں نے اس بات پر زور دیا کہ شفاف حکمرانی اور احتساب کا فروغ پوری معاشرت کی مشترکہ ذمہ داری ہے، جس کے لیے عوام اور اداروں کو یکساں کردار ادا کرنا ہوگا۔سیمینار سے مختلف اداروں کے نمائندگان اور ماہرین نے بھی خطاب کیا، جن میں نیشنل اکاؤنٹیبلٹی بیورو (NAB) کے نمائندہ جہانگیر جاوید میمن، پولیس ڈیپارٹمنٹ کے DSP زاہد، ڈسٹرکٹ ایجوکیشن آفیسر (خواتین) زراتون بی بی اور ماہرِ تعلیم پروفیسر ڈاکٹر جان محمد شامل تھے۔
مقررین نے کرپشن کی وجوہات، اقسام اور اس کے نقصانات پر روشنی ڈالی اور بتایا کہ اداروں کی مضبوطی شفافیت، قانون کی بالادستی اور مؤثر احتساب سے ہی ممکن ہے۔ ان کا کہنا تھا کہ قیادت میں دیانت اور اصول پسندی معاشروں کی پائیدار ترقی کی بنیاد ہوتی ہے۔
چیف گیسٹ ایڈیشنل ڈپٹی کمشنر جنرل ڈاکٹر عبدالشکور نے اپنے خطاب میں کہا کہ کرپشن کے خلاف جنگ صرف حکومتی اداروں تک محدود نہیں بلکہ یہ ہر شہری کی ذمہ داری ہے۔ انہوں نے اینٹی کرپشن مکران ڈویژن کی کاوشوں کو سراہتے ہوئے کہا کہ عوامی شعور بیدار کرنے کے لیے ایسے پروگرام نہایت اہم ہیں اور ان کا تسلسل برقرار رہنا چاہیے۔
تقریب میں سول سوسائٹی سے محمد جان بلوچ اور این سی ایچ ڈی نذیر احمد بلوچ نے بھی اظہارِ خیال کیا۔ مقررین نے کرپشن کے خاتمے کے لیے عوامی شمولیت، اجتماعی ذمہ داری اور مثبت سماجی رویوں کے فروغ پر زور دیا۔
تقریب کے اختتام پر ڈپٹی ڈائریکٹر فرید سخی نے تمام مہمانانِ گرامی، مقررین، اساتذہ، طلباء اور شرکاء کا شکریہ ادا کیا۔ انہوں نے عزم ظاہر کیا کہ اینٹی کرپشن مکران ڈویژن بدعنوانی کے خاتمے کے مشن کو زیادہ مؤثر انداز میں جاری رکھے گا۔
سیمینار میں مختلف سرکاری محکموں کے افسران نے بھی شرکت کی، جن میں ایکسین پی ایچ ای مومن بلوچ، ڈائریکٹر لائیو اسٹاک ڈاکٹر سخی بلوچ اور اسسٹنٹ ڈائریکٹر اینٹی کرپشن منیر پیرل شامل تھے۔ ان کی شرکت نے تقریب کی اہمیت میں مزید اضافہ کیا اور اسے انسدادِ بدعنوانی کے حوالے سے ایک نمایاں سنگِ میل بنا دیا۔