وزیر منصوبہ بندی احسن اقبال سے اقوام متحدہ کے ریزیڈنٹ کوآرڈینیٹر کی ملاقات، سیلابی تباہ کاریوں اور ماحولیاتی چیلنجز پر گفتگو

عسکر انٹرنیشنل رپورٹ
اسلام آباد، 10 ستمبر
وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال سے پاکستان میں اقوام متحدہ کے ریزیڈنٹ کوآرڈینیٹر محمد یحییٰ نے ملاقات کی، جس میں پنجاب میں حالیہ سیلابی صورتحال اور تعاون کے امکانات پر تبادلہ خیال کیا گیا۔

محمد یحییٰ نے پنجاب بھر میں سیلاب سے ہونے والی ہلاکتوں، نقصانات اور تباہ کاریوں پر گہرے دکھ اور ہمدردی کا اظہار کیا۔

وزیر منصوبہ بندی نے کہا کہ راوی، چناب اور ستلج کے سیلابی ریلوں نے وسیع اراضی کو لپیٹ میں لے لیا ہے۔ “پنجاب میں سیلاب نے لاکھوں ایکڑ زمین کو متاثر کیا ہے، نارووال میں زرعی زمین، انفراسٹرکچر اور مویشیوں کو بڑا نقصان پہنچا ہے،” انہوں نے بتایا۔

پروفیسر احسن اقبال نے کہا کہ ماضی میں سیلابی آفات کے دوران اقوام متحدہ کا تعاون ہمیشہ قابلِ تحسین رہا ہے۔ “حکومت نقصانات کا تخمینہ لگا رہی ہے اور اقوام متحدہ کے ساتھ مل کر ضروریات کا جامع جائزہ لیا جائے گا۔ حکومت اپنے وسائل سے تعمیر نو کا آغاز کرے گی، تاہم عالمی برادری کی مدد ناگزیر ہے،” انہوں نے کہا۔

وزیر منصوبہ بندی نے زور دیا کہ ترقی یافتہ ممالک پر اخلاقی ذمہ داری عائد ہوتی ہے کہ وہ موسمیاتی آفات سے متاثرہ ممالک کو فنڈز فراہم کریں۔

انہوں نے کہا کہ پاکستان میں سات ہزار سے زائد گلیشیئرز ہیں جن میں سے کئی گلگت بلتستان میں خطرناک حد تک تیزی سے پگھل رہے ہیں۔ 2025ء کو پاکستان میں “سالِ گلیشیئرز” قرار دیا گیا ہے، اس لیے عالمی برادری کو گلیشیئرز سے جڑے خطرات سے نمٹنے کے لیے پاکستان کے ساتھ تعاون بڑھانا ہوگا۔