اسلام آباد ٹریفک پولیس نے سیکرٹریٹ بلاکس سے غیر قانونی پارکنگ ختم کردی

اسلام آباد، 1 ستمبر (عسکر انٹرنیشنل رپورٹ ): اسلام آباد ٹریفک پولیس (آئی ٹی پی) نے چیف ٹریفک آفیسر (سی ٹی او) کیپٹن (ر) حمزہ ہمایوں کی قیادت میں دارالحکومت کے سیکرٹریٹ بلاکس میں غیر قانونی پارکنگ کے خلاف مہم کا آغاز کیا ہے۔ اس دوران بڑی تعداد میں گاڑیاں اور موٹر سائیکلیں جو غیر مناسب طریقے سے پارک کی گئی تھیں، ٹو کر کے اٹھالی گئیں۔

اس آپریشن کا مقصد سیکرٹریٹ کے اندر ٹریفک کی روانی کو بہتر بنانا ہے تاکہ بین الاقوامی وفود اور عوام کو آسانی ہو۔ سی ٹی او نے تصدیق کی کہ شہر بھر میں غیر قانونی پارکنگ اور تجاوزات کے خلاف یہ مہم جاری رہے گی۔ ٹریفک کی آمدورفت میں رکاوٹیں ختم کی جائیں گی۔

اسلام آباد بھر میں روزانہ کی بنیاد پر آپریشن کی منصوبہ بندی کی گئی ہے جس میں غیر قانونی پارکنگ کے خلاف زیرو ٹالرنس پالیسی اپنائی جائے گی۔ آئی ٹی پی شہریوں سے اپیل کرتی ہے کہ وہ مقررہ پارکنگ زونز کو استعمال کریں۔ ادارے نے عوامی خدمت کے لیے اپنی وابستگی کا اعادہ کرتے ہوئے کہا کہ اس کا مقصد دارالحکومت کے پارکنگ کے بنیادی ڈھانچے کو بہتر بنانا ہے، نہ کہ اس میں خلل ڈالنا۔

ٹریفک کی روانی کو یقینی بنانے اور ذمہ دارانہ روڈ کے استعمال کو فروغ دینے کے لیے عوام سے تعاون کی درخواست کی گئی ہے۔