عوامی بجٹ کے برعکس بلوچستان کے حالات مزید سنگین ھونگے۔پروفیسرحلیم صادق

عوامی بجٹ کے برعکس

بلوچستان کے حالات مزید

سنگین ھونگے۔پروفیسرحلیم

صادق

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وفاقی اور صوبائی حکومتیں

عوام کو حقیقی ریلیف فراہم

کرنے کیلئے عملی اقدامات

کریں، عوام پاکستان پارٹی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تعلیم، صحت، روزگار اور

بنیادی سہولیات کو نظر انداز

کرنا ناقابل قبول ہے، صوبائی

جنرل سیکرٹری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کوئٹہ (پ ر ) عوام پاکستان پارٹی بلوچستان کے صوبائی جنرل سیکرٹری پروفیسر ڈاکٹر حلیم صادق نے خبردار کیا ہے کہ اگر بلوچستان کا آئندہ بجٹ عوامی مفادات، صوبے کی ضروریات اور عوامی توقعات کے برعکس مرتب کیا گیا تو اس کے نتیجے میں بلوچستان کے معاشی، سماجی اور انتظامی مسائل مزید سنگین ہو جائیں گے، جس کے منفی اثرات عام شہریوں کو بھگتنا پڑیں گے۔اپنے ایک بیان میں پروفیسر ڈاکٹر حلیم صادق نے کہا کہ بلوچستان رقبے کے لحاظ سے ملک کا سب سے بڑا صوبہ ہے، لیکن بدقسمتی سے آج بھی یہاں کے عوام بنیادی سہولیات، معیاری تعلیم، صحت کی بہتر خدمات، صاف پانی، روزگار کے مواقع اور جدید انفراسٹرکچر سے محروم ہیں۔ ایسے حالات میں ایک ایسا بجٹ ناگزیر ہے جو عوامی مسائل کے حل، پسماندہ علاقوں کی ترقی اور نوجوانوں کیلئے روزگار کے مواقع پیدا کرنے پر مرکوز ہو۔انہوں نے کہا کہ حکومت کو چاہیے کہ بجٹ میں تعلیم، صحت، زراعت، آبنوشی، مواصلات اور توانائی کے شعبوں کیلئے خاطر خواہ فنڈز مختص کرے تاکہ عوام کی مشکلات میں کمی لائی جا سکے۔ صرف اعداد و شمار کے اعلانات اور ترقی کے دعوؤں سے عوام کے مسائل حل نہیں ہوں گے بلکہ زمینی حقائق کو مدنظر رکھتے ہوئے عملی اقدامات کرنا ہوں گے۔پروفیسر ڈاکٹر حلیم صادق نے مزید کہا کہ بلوچستان کے نوجوان بے روزگاری، مہنگائی اور وسائل کی غیر منصفانہ تقسیم سے شدید متاثر ہیں۔ اگر بجٹ میں عوامی فلاح و بہبود اور نوجوانوں کے مستقبل کو ترجیح نہ دی گئی تو عوام میں بے چینی میں اضافہ ہوگا، جو کسی بھی طور صوبے اور ملک کے مفاد میں نہیں۔ انہوں نے وفاقی اور صوبائی حکومتوں سے مطالبہ کیا کہ بجٹ سازی کے عمل میں عوامی نمائندوں، ماہرین اور مختلف شعبہ ہائے زندگی سے تعلق رکھنے والے افراد کی آراء کو شامل کیا جائے تاکہ ایک ایسا متوازن اور عوام دوست بجٹ پیش کیا جا سکے جو بلوچستان کی محرومیوں کے خاتمے اور پائیدار ترقی کی ضمانت بن سکے۔ عوام پاکستان پارٹی بلوچستان کے صوبائی جنرل سیکرٹری نے اس عزم کا اظہار کیا کہ ان کی جماعت ہر فورم پر بلوچستان کے عوام کے حقوق، وسائل اور ترقیاتی ضروریات کے تحفظ کیلئے اپنی آواز بلند کرتی رہے گی اور کسی بھی ایسے اقدام کی مخالفت کرے گی جو عوامی مفادات کے منافی ہو۔