وزیر خوراک خیبرپختونخوا کا پنجاب حکومت پر شدید ردعمل: آٹے اور گندم کی ترسیل پر پابندی کے ذریعے مصنوعی بحران پیدا کرنے کی کوشش

وزیر خوراک خیبرپختونخوا کا پنجاب حکومت پر شدید ردعمل: آٹے اور گندم کی ترسیل پر پابندی کے ذریعے مصنوعی بحران پیدا کرنے کی کوشش

خیبرپختونخوا کے وزیر خوراک ظاہر شاہ طورو نے پنجاب حکومت کی جانب سے صوبے میں گندم اور آٹے کی ترسیل پر پابندی پر شدید تحفظات کا اظہار کیا ہے اور کہا کہ یہ پابندی خیبرپختونخوا میں مصنوعی بحران پیدا کرنے کی کوشش ہے۔

وزیر خوراک نے کہا کہ پنجاب کی پالیسیوں کی وجہ سے اٹک اور دیگر داخلی پوائنٹس پر KP کے فلور مل مالکان اور آٹا ڈیلرز کے سیکڑوں ٹرک روکے گئے ہیں، جس کی وجہ سے صوبے میں آٹے کی قیمت 20 کلو تھیلے کی 2,800 روپے تک پہنچ گئی ہے، اور عام شہریوں کی مشکلات میں اضافہ ہوا ہے۔

انہوں نے مزید کہا کہ پنجاب حکومت مسلسل آئین کے آرٹیکل 151 کی خلاف ورزی کر رہی ہے، جو ملک کے اندر آزادانہ تجارت کی اجازت دیتا ہے، اور KP اپنی گندم و آٹے کی تقریباً 83 فیصد ضروریات پنجاب، پاسکو اور درآمد شدہ گندم سے پوری کرتا ہے۔

وزیر خوراک نے کہا کہ ملک میں موجود 33 ملین میٹرک ٹن گندم کے اسٹاک اور پنجاب کی اپنی ضرورت سے زیادہ گندم کے باوجود یہ پابندیاں عائد کی گئی ہیں، جو غیر آئینی اور غیر منصفانہ ہیں۔

انہوں نے وفاقی حکومت اور متعلقہ اداروں سے مطالبہ کیا کہ اس غیر آئینی پابندی کے خلاف فوری اور مؤثر اقدامات کیے جائیں تاکہ صوبوں کے درمیان غذائی توازن اور باہمی تعاون برقرار رہے۔

آخر میں وزیر خوراک نے عوام، میڈیا اور سوشل میڈیا صارفین سے اپیل کی کہ وہ پنجاب حکومت کی اس پابندی کی مذمت کریں اور آواز بلند کریں۔