جاپان میں پولیس نے ایک ایسی خاتون کو گرفتار کر لیا ہے جن کے گھر کے فریزر سے ان کی والدہ کی لاش برآمد ہوئی ہے۔
ٹوکیو میں مقامی ذرائع ابلاغ پر یہ خبر نشر کی جا رہی ہے کہ پولیس ذرائع نے نام نہ ظاہر کرتے ہوئے بتایا ہے کہ 48 سالہ یومی یوشینو کے مطابق انھوں نے 10 سال سے اپنی والدہ کو مردہ حالت میں فریزر میں چھپائے رکھا ہے۔
ان کا کہنا ہے کہ انھوں نے ایسا اس لیے کیا کیونکہ وہ ٹوکیو میں ’اپنے مشترکہ گھر سے باہر نہیں جانا چاہتی تھیں۔‘
پولیس کا کہنا ہے کہ جمی ہوئی حالت میں اس مردہ جسم پر بظاہر زخموں کے نشان نہیں ہیں۔
حکام اب تک اس خاتون کی موت کے وقت اور وجہ کا تعین نہیں کرسکے۔
اطلاعات کے مطابق یوشینو کی جانب سے وقت پر کرایہ ادا نہ کرنے کی وجہ سے انھیں اپنا اپارٹمنٹ چھوڑنے کا کہا گیا تھا۔ اس کے بعد صفائی پر مامور ایک شخص نے فریزر میں یہ لاش دیکھ کر پولیس کو اطلاع دی۔
پولیس کا کہنا ہے کہ لاش کو کچھ اس طرح موڑ کر رکھا گیا تھا کہ وہ فریزر میں پوری آسکے۔
جمعے کو پولیس نے یوشینو کو ٹوکیو کے قریب ایک شہر کے ہوٹل سے گرفتار کیا ہے۔
