مبارکباد – بین المذاہب ہم آہنگی کا خوبصورت مظاہرہ

نصیرآباد (نامہ نگار):

ایکسین کیسکو آپریشن نصیرآباد محمد وریام منجھو کی قیادت میں دیوالی کے پُرمسرت موقع پر ایک پروقار تقریب کا انعقاد کیا گیا، جس میں ہندو برادری کے رہنماؤں اور معزز شخصیات نے بھرپور شرکت کی۔ تقریب میں رٹائرڈ ڈپٹی ڈائریکٹر زراعت محمد اسلم لغاری، چوہدری راجیش کمار، پون کمار کستوری، انیل کمار اور سنیل کمار شریک ہوئے۔

تقریب کا آغاز دیوالی کے خوشیوں بھرے موقع پر کیک کاٹنے سے ہوا۔ اس موقع پر ایکسین کیسکو محمد وریام منجھو نے ہندو برادری کو دلی مبارکباد پیش کرتے ہوئے کہا کہ دیوالی روشنیوں، خوشیوں اور بھائی چارے کا پیغام دینے والا تہوار ہے۔ انہوں نے کہا کہ پاکستان میں بسنے والی تمام اقلیتوں کو اپنے مذہبی تہوار منانے کی مکمل آزادی حاصل ہے، اور کیسکو نے دیوالی کے موقع پر بجلی کی بلاتعطل فراہمی کے لیے خصوصی انتظامات کیے۔

تقریب کے دوران ہندو برادری کے رہنماؤں نے محمد وریام منجھو کو ہار پہنا کر چارج سنبھالنے پر مبارکباد پیش کی۔

انہوں نے کہا کہ ہندو برادری اس وطن کا ایک اہم اور وفادار طبقہ ہے، اور ان کی خوشیوں میں شریک ہونا ہماری قومی و اخلاقی ذمہ داری ہے۔

تقریب کے اختتام پر شرکاء نے ایک دوسرے کو مٹھائیاں پیش کیں، نیک تمناؤں کا اظہار کیا اور علاقے میں بین المذاہب ہم آہنگی اور رواداری کے فروغ پر زور دیا۔

محفل کا ماحول خوشگوار، پرامن اور روشنیوں سے جگمگا رہا، جس میں اتحاد، محبت اور احترامِ انسانیت کی جھلک نمایاں تھی۔