دیہی خواتین کے عالمی دن کی مناسبت سے “شمولیتی ووٹر اندراج” کے موضوع پر تقریب کا انعقاد

تاریخ: 20 اکتوبر 2025
جاری کردہ: دفتر صوبائی الیکشن کمشنر بلوچستان، کوئٹہ

کوئٹہ (عسکر انٹرنیشنل رپورٹ) — دیہی خواتین کے عالمی دن کی مناسبت سے دفتر صوبائی الیکشن کمشنر بلوچستان میں ایک پُروقار تقریب کا انعقاد کیا گیا، جس کا مرکزی موضوع شمولیتی ووٹر اندراج اور خواتین کی انتخابی عمل میں فعال شمولیت تھا۔

تقریب میں جوائنٹ صوبائی الیکشن کمشنر بلوچستان سید وسیم احمد جعفری، ڈائریکٹر الیکشنز عبداللہ، ڈائریکٹر ایڈمن نعیم احمد، ڈپٹی ڈائریکٹر الیکشنز محترمہ عالیہ نذر کے علاوہ سول سوسائٹی تنظیموں، خواتین کی کمیونٹی آرگنائزیشنز اور مختلف سیاسی جماعتوں سے تعلق رکھنے والی خواتین نمائندگان نے شرکت کی۔

مقررین نے اپنے خطاب میں کہا کہ دیہی خواتین جمہوری عمل کو مضبوط بنانے میں کلیدی کردار ادا کرتی ہیں۔ خواتین کے ووٹر کے طور پر اندراج کو یقینی بنانا اُن کے آئینی حق کے تحفظ اور معاشرتی ترقی کی جانب ایک اہم قدم ہے۔

شرکاء نے زور دیا کہ خواتین میں ووٹ کے حق سے متعلق آگاہی پیدا کرنا اور ووٹر لسٹوں میں ان کی شمولیت کو ممکن بنانا جمہوری استحکام کے لیے ناگزیر ہے۔

اختتامی کلمات میں جوائنٹ صوبائی الیکشن کمشنر بلوچستان سید وسیم احمد جعفری نے تمام شرکاء کی شرکت کو سراہا اور کہا کہ الیکشن کمیشن خواتین سمیت تمام طبقات کی شمولیت کے لیے پُرعزم ہے تاکہ ووٹر اندراج کا عمل شفاف، جامع اور قابلِ رسائی بنایا جا سکے۔

انہوں نے کہا کہ خواتین کی مساوی نمائندگی ہی حقیقی جمہوری معاشرے کی بنیاد ہے۔

ترجمان، دفتر صوبائی الیکشن کمشنر بلوچستان