پی اے سی سی میں شاندار فیشن شو—پاکستانی ڈیزائنرز کی تخلیقی صلاحیتوں کو بے حد سراہا گیا

عسکر انٹرنیشنل رپورٹ

کراچی — پاکستان امریکن کلچرل سینٹر (پی اے سی سی) کے زیر اہتمام اور گریس کارگو کوریئر کے اشتراک سے ایک رنگا رنگ فیشن شو منعقد کیا گیا، جس میں پاکستانی فیشن انڈسٹری کے تخلیقی رجحانات اور نوجوان ڈیزائنرز کی بڑھتی ہوئی صلاحیتوں کو بھرپور انداز میں پیش کیا گیا۔

تقریب میں فیشن، کاروباری اور ثقافتی حلقوں کی نمایاں شخصیات نے شرکت کی، جبکہ کمشنر فیڈرل بورڈ آف ریونیو کراچی سردار تیمور درانی تقریب کے مہمانِ خصوصی تھے۔

فیشن شو میں 30 فیشن ڈیزائنرز، 20 میک اپ آرٹسٹس اور 20 ماڈلز نے حصہ لیا، جنہوں نے جدید اور روایتی طرز کے ملبوسات پیش کر کے شرکا سے خوب داد سمیٹی۔

مہمان خصوصی تیمور درانی نے پاکستانی ڈیزائنرز کی صلاحیتوں کو سراہتے ہوئے کہا کہ پاکستانی فیشن ڈیزائنرز نہایت باصلاحیت ہیں اور ان کے تیار کردہ ملبوسات کو دنیا بھر میں قدر کی نگاہ سے دیکھا جاتا ہے۔
’’فیشن انڈسٹری میں ترقی کے بے شمار مواقع موجود ہیں، نوجوان اس شعبے میں آگے بڑھ کر بہترین مستقبل بنا سکتے ہیں‘‘، انہوں نے کہا۔

ہیڈ آف ڈیزائن ڈپارٹمنٹ اور آرگنائزر انیتا خان نے کہا کہ فیشن ایک وسیع اور تیزی سے ترقی کرنے والا شعبہ ہے۔
’’پاکستانی ڈیزائنرز دنیا بھر میں اپنی قابلیت کا لوہا منوا رہے ہیں۔ ہم ان کے کام کو عالمی سطح پر اجاگر کرنے کے لیے مزید اقدامات کریں گے‘‘، انہوں نے بتایا۔

تقریب میں جیلانی یوسف چیئرمین کلچر کمیٹی، اسلم خان بانی و صدر گریس کارگو کوریئر، نصرت چیئرمین مارکیٹنگ کمیٹی، اور خالدہ خان سیکرٹری وومن چیمبر آف کامرس بھی شریک تھے۔

کلچر کمیٹی کے چیئرمین جیلانی یوسف نے بتایا کہ پی اے سی سی میں ڈیزائننگ، فیشن، میک اپ اور موسیقی سمیت مختلف شعبوں میں کلاسز بھی جاری ہیں۔
’’یہ نوجوان مستقبل میں اپنے شعبوں میں مہارت کے ساتھ ملک کا نام روشن کریں گے‘‘، انہوں نے کہا۔

گریس کارگو کے صدر اسلم خان نے کہا کہ ان کی تنظیم ہمیشہ ایسے ثقافتی پروگراموں کے انعقاد میں بھرپور تعاون کرتی رہی ہے اور آئندہ بھی فیشن شوز کے لیے معاونت جاری رہے گی۔

تقریب کے اختتام پر ڈیزائنرز، ماڈلز اور بیوٹیشنز میں سرٹیفکیٹس تقسیم کیے گئے جبکہ مہمانِ خصوصی کو خصوصی شیلڈ پیش کی گئی۔