وزیر اعلیٰ خیبر پختونخوا محمد سہیل آفریدی نے ضلع مانسہرہ کے کالج دوراہا چوک میں خطاب کرتے ہوئے کہا ہے کہ ایبٹ آباد، مانسہرہ اور ہری پور کے عوام کے والہانہ استقبال پر وہ دل کی گہرائیوں سے شکر گزار ہیں

مانسہرہ، 17 جنوری 2026

وزیر اعلیٰ خیبر پختونخوا محمد سہیل آفریدی نے ضلع مانسہرہ کے کالج دوراہا چوک میں خطاب کرتے ہوئے کہا ہے کہ ایبٹ آباد، مانسہرہ اور ہری پور کے عوام کے والہانہ استقبال پر وہ دل کی گہرائیوں سے شکر گزار ہیں، اور عوام کا جوش و جذبہ واضح کر رہا ہے کہ قوم مکمل طور پر تیار ہے۔

وزیر اعلیٰ نے کہا کہ بانی چیئرمین تحریک انصاف عمران خان کو ناحق قیدِ تنہائی میں رکھا گیا ہے اور انہیں خاندان اور پارٹی قیادت سے ملاقات کی اجازت نہیں دی جا رہی۔ انہوں نے کہا کہ عمران خان کی اہلیہ بشریٰ بی بی، جن کا سیاست سے کوئی تعلق نہیں، انہیں بھی قید کیا گیا، جبکہ عمران خان کی بہنیں جب جیل میں ملاقات کے لیے جاتی ہیں تو ان کے ساتھ ناروا سلوک کیا جاتا ہے۔

سہیل آفریدی نے کہا کہ عمران خان اور ان کا پورا خاندان ہماری آنے والی نسلوں کے لیے قربانیاں دے رہا ہے اور وہ اس فرسودہ نظام کی تبدیلی اور عوام کی خوشحالی چاہتے ہیں۔ انہوں نے الزام عائد کیا کہ عمران خان اور ان کی جماعت کے خلاف منظم سازشیں کی جا رہی ہیں، تاہم ان کا ڈٹ کر مقابلہ کیا جائے گا۔

انہوں نے کہا کہ خیبر سے کراچی تک عوام کے جذبے نے ثابت کر دیا ہے کہ اس بار انہیں کوئی طاقت نہیں روک سکتی۔ وزیر اعلیٰ نے کہا کہ تحریک انصاف معاملات کو خوش اسلوبی سے حل کرنا چاہتی ہے، لیکن اگر فیصلہ سڑکوں پر کرنا پڑا تو ہر چوک ڈی چوک بنے گا، اور یہی عوام عمران خان کو رہا بھی کرائے گی اور وزیر اعظم بھی بنائے گی۔