صوبائی وزیر تعلیم بلوچستان راحیلہ حمید خان درانی نے انٹراسکول ہاکی ٹورنامنٹ کے فائنل میں شرکت کی اور کامیاب کھلاڑیوں میں انعامات تقسیم کیے

عسکر انٹرنیشنل رپورٹ

 کوئٹہ، 9 نومبر 2025: صوبائی وزیر تعلیم بلوچستان، محترمہ راحیلہ حمید خان درانی نے یوم دفاع کے موقع پر منعقدہ انٹراسکول ہاکی ٹورنامنٹ کے فائنل مقابلے میں شرکت کی اور کامیاب کھلاڑیوں میں تمغے و انعامات تقسیم کیے۔

تقریب سے خطاب کرتے ہوئے وزیر تعلیم نے کہا کہ تعلیمی اداروں میں کھیلوں کو فروغ دینا ان کی اولین ترجیح ہے۔ انہوں نے زور دے کر کہا، “میں چاہتی ہوں کہ سکولوں میں نصابی تعلیم کے ساتھ ساتھ غیر نصابی سرگرمیاں، خاص طور پر کھیل، لازمی طور پر شامل ہوں۔”

محترمہ درانی نے کہا کہ وزیر اعلیٰ بلوچستان کے ویژن کے مطابق کھیلوں کو صوبے کے دور دراز علاقوں تک پہنچانا ان کی ترجیح ہے اور اسی سلسلے میں زیادہ سے زیادہ اسکولوں میں کھیلوں کو متعارف کرانے پر توجہ مرکوز کی جا رہی ہے۔ انہوں نے فخر کے ساتھ کہا کہ ہاکی ہمارا قومی کھیل ہے اور انہیں ماضی میں خود بھی ہاکی کھیلنے کا شرف حاصل رہا۔

وزیر تعلیم نے ٹورنامنٹ کے انعقاد پر ہاکی فیڈریشن کی صوبائی انتظامیہ اور اسکول مینجمنٹ کی تعریف کی اور یقین دلایا کہ کھیلوں کے حوالے سے پیش کیے گئے تمام مطالبات پر غور کیا جائے گا۔

انہوں نے کہا کہ نوجوان نسل کو کھیلوں میں مصروف رکھنا ان کی صحت اور نظم و ضبط کے لیے نہایت اہم ہے۔ “ہم چاہتے ہیں کہ صوبے بھر میں زیادہ سے زیادہ کھیل کے میدان قائم کیے جائیں تاکہ ہمارے نوجوان صحت مند اور چاق و چوبند رہیں۔”

اس موقع پر انہوں نے ایک اہم نکتہ بھی اجاگر کیا کہ نوجوانوں کو منفی سرگرمیوں اور منشیات جیسی برائیوں سے بچانے کا سب سے مؤثر حل انہیں کھیلوں کی طرف راغب کرنا ہے۔

تقریب میں اسکول کے طلباء، اساتذہ، اور مقامی شخصیات کی بڑی تعداد نے شرکت کی، جس سے کھیلوں اور نوجوانوں کی تربیت کے حوالے سے عوامی دلچسپی کا اندازہ لگایا جا سکتا ہے۔