یورپی یونین کے تعاون سے چلنے والے منصوبے سے اسی ہزار سے زائد افراد مستفید ہوئے

یورپی یونین کے تعاون سے چلنے والے منصوبے سے اسی ہزار سے زائد افراد مستفید ہوئے

گلگت : پاکستان میں یورپی یونین کے ہیڈ آف کوآپریشن، جیرون ولیمز نے نوجوانوں کو بااختیار بنانے اور سول سوسائٹی کو مستحکم کرنے کو ایک جامع اور پائیدار مستقبل کی تشکیل کے لیے ضروری قرار دیا۔ وہ گلگت کے ایک مقامی ہوٹل میں یورپی یونین کے مالی تعاون سے چلنے والے پانچ سالہ منصوبے “گلگت بلتستان اور چترال میں سول سوسائٹی اور نوجوانوں کی کووڈ-19 سے بحالی کی صلاحیت کو مضبوط بنانا” کی اختتامی تقریب سے خطاب کر رہے تھے۔

یہ منصوبہ آغا خان رورل سپورٹ پروگرام (AKRSP) نے آغا خان فاؤنڈیشن (AKF) کے اشتراک سے 2021 میں شروع کیا تھا تاکہ کورونا وبا کے سماجی و معاشی اثرات سے متاثرہ علاقوں میں بحالی اور بہتری لائی جا سکے۔ یہ منصوبہ گلگت بلتستان اور چترال کے چھ اضلاع میں جاری رہا، جس کا مقصد معاشرتی بحالی، معاشی بحالی میں معاونت، اور نوجوانوں کو بااختیار بنانا تھا۔

جیرون ولیمز نے مقامی کمیونٹیز، اے کے آر ایس پی اور آغا خان ڈویلپمنٹ نیٹ ورک کے دیگر اداروں کو اہم ترقیاتی شراکت دار قرار دیتے ہوئے ان کے کردار کو سراہا۔ انہوں نے یورپی یونین کی طویل المدتی وابستگی کو دہرایا کہ وہ مقامی اداروں کے ساتھ مل کر نوجوانوں اور سول سوسائٹی کو مضبوط بنانے کے لیے کام کرتی رہے گی۔

گلگت بلتستان اسمبلی کے اسپیکر، نذیر احمد ایڈووکیٹ نے حکومتِ گلگت بلتستان کی نمائندگی کرتے ہوئے اس منصوبے کی نچلی سطح پر مرکوز حکمتِ عملی کو سراہا۔ انہوں نے کہا کہ ایسے منصوبوں کا تسلسل نہایت ضروری ہے تاکہ نوجوانوں کی شمولیت، جامع معاشی ترقی، اور مقامی سول سوسائٹی کو مزید تقویت ملے۔ انہوں نے AKRSP کی 1982 سے جاری خدمات کو بھی خراجِ تحسین پیش کیا۔

تقریب کے دوران دو روزہ گلگت بلتستان و چترال یوتھ کنونشن کے تحت ایک نمائش کا انعقاد کیا گیا، جس میں منصوبے سے منسلک 150 مندوبین نے شرکت کی۔ نمائش میں خواتین کی زیر قیادت کاروبار، ہنر مند نوجوان، ڈیجیٹل خدمات فراہم کرنے والے، اور کمیونٹی تنظیمیں شامل تھیں، جو منصوبے کے وسیع اثرات کا عملی مظہر تھیں۔ اس موقع پر ایک تجرباتی نشست بھی منعقد ہوئی، جس میں مستفید افراد — جن میں سول سوسائٹی کے نمائندگان، صنفی جوڑی سہولت کار، مائیکرو انٹرپرینیورز، اور ڈیجیٹل تربیت یافتہ نوجوان شامل تھے — نے اپنے خیالات اور کامیاب تجربات شیئر کیے۔

آغا خان فاؤنڈیشن کے سی ای او، اختر اقبال نے منصوبے کے مثبت اور پائیدار اثرات کو سراہتے ہوئے باہمی تعاون کی اہمیت پر زور دیا۔ AKRSP کے جنرل مینیجر/سی ای او، جمیل الدین نے یورپی یونین کی فراخدلانہ معاونت پر شکریہ ادا کیا اور حکومت و مقامی کمیونٹیز کے ساتھ مل کر مواقع اور شمولیت پر مبنی مستقبل کی تعمیر کے عزم کا اعادہ کیا۔

پراجیکٹ مینیجر، اعجاز کریم نے منصوبے کی کامیابیوں کو بیان کرتے ہوئے کہا کہ اس سے 80,000 سے زائد افراد براہِ راست مستفید ہوئے۔ منصوبے کے دوران 12 نئے لوکل سپورٹ آرگنائزیشنز قائم کیے گئے اور پہلے سے موجود 57 سول سوسائٹی تنظیموں کی صلاحیتوں کو بہتر بنایا گیا تاکہ وہ بہتر طور پر کمیونٹی کی خدمت انجام دے سکیں۔ منصوبے کے تحت 7,000 سے زائد افراد کو نفسیاتی معاونت، صنفی آگاہی، اور زندگی کے بنیادی ہنر فراہم کیے گئے۔

معاشی بحالی کے لیے، 270 مائیکرو اور چھوٹے کاروباروں کو مالی معاونت اور کاروباری تربیت فراہم کی گئی، جب کہ 163 کاروباروں کو معیار اور سرٹیفکیشن کے حوالے سے رہنمائی فراہم کی گئی۔ 620 سے زائد نوجوانوں کو مختلف شعبہ جات — جیسے مہمان نوازی، سولر پی وی سسٹمز، فیشن ڈیزائن، ابتدائی بچپن کی تعلیم، اور ڈیجیٹل مہارتوں — میں ووکیشنل تربیت دی گئی اور انہیں ابتدائی ساز و سامان بھی فراہم کیا گیا۔

مزید برآں، منصوبے کے تحت نو یوتھ آئی ٹی ہبز قائم کیے گئے، جنہوں نے نوجوانوں کو ڈیجیٹل سہولیات، انٹرنیٹ تک رسائی، اور روزگار کے وسائل فراہم کیے۔ 240 تربیت یافتہ یوتھ فسیلیٹیٹرز نے 4,500 نوجوانوں کو لائف اسکلز کے موضوعات — جیسے مواصلات، فیصلہ سازی، اور مسائل کا مقابلہ کرنے کی صلاحیت — پر تربیت دی۔ اس کے علاوہ، 200 نوجوانوں، یوتھ گروپس، اور مقامی تنظیموں کو کمیونٹی پر مبنی تخلیقی منصوبے شروع کرنے کے لیے انوویشن گرانٹس دی گئیں۔

تقریب کا اختتام باہمی عزم، اعتماد اور تعاون کے جذبے کے ساتھ ہوا، جس میں تمام شراکت داروں نے اس منصوبے کی کامیابیوں کو برقرار رکھنے اور انہیں وسعت دینے کے عزم کا اظہار کیا۔